Nursultan Nazarbaev qazaqstandyqtardy Jeńis kúnimen quttyqtady

NUR-SULTAN. QazAqparat - Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev el turǵyndaryn Jeńis kúni merekesimen quttyqtady, dep habarlaıdy QazAqparat.

«Qurmetti qazaqstandyqtar!

Barshańyzdy Uly Jeńis kúnimen shyn júrekten quttyqtaımyn! Bul qasterli kún halqymyzdyń eren erligi men birliginiń, qaharmandyǵynyń sımvoly bolyp sanalady.

Biz búgin soǵys qurbandarynyń rýhyna taǵzym etip, ardagerlerge qurmet kórsetemiz. Olardyń maıdandaǵy ójettigi men tyldaǵy eńbegi týǵan elge degen qaltqysyz súıispenshiliktiń jáne qaısarlyqtyń jarqyn úlgisi ekeni sózsiz», - dedi N.Nazarbaev.

Tuńǵysh Prezıdent jıyrmasynshy ǵasyrdaǵy eń surapyl soǵystaǵy jeńis ońaılyqpen kelmegenin eske saldy.

«Otan úshin ot keshkenderdiń erligin umytpaý, ardagerlerge qamqorlyq kórsetý – barshamyzdyń qasıetti boryshymyz.

Batyr babalarymyzdyń qaharmandyǵy qazirgi tynysh zamanda da bizdiń boıymyzǵa jiger beredi. Ol aýyzbirlik, patrıottyq, qaısarlyq jáne Otanǵa degen mahabbat arqyly kez kelgen qıyndyqty jeńip, beıbit ári baqýatty ómirge qol jetkizýge bolady degen senimimizdi nyǵaıta túsedi.

Uly Jeńis kúninde barshańyzǵa myqty densaýlyq, baıandy baqyt pen jaqsylyq tileımin! Aspanymyz árdaıym ashyq bolsyn!», - dedi Nursultan Nazarbaev.