Nursultan Nazarbaev Qabdesh Jumadilovtiń otbasy men týǵan-týystaryna kóńil aıtty

NUR-SULTAN. QazAqparat - Nursultan Nazarbaev Qabdesh Jumadilovtiń qaıtys bolýyna baılanysty marqumnyń otbasy men týǵan-týystaryna kóńil aıtý jedelhatyn joldady, dep habarlaıdy QazAqparat Elbasynyń resmı saıtyna silteme jasap.

Elbasy kórnekti qalamger, Qazaqstannyń halyq jazýshysy, Memlekettik syılyqtyń laýreaty Qabdesh Jumadilovtiń ómirden ótýine baılanysty orny tolmas aýyr qaıǵyǵa ortaqtasyp, kóńil aıtty.

Qazaqstannyń Tuńǵysh Prezıdenti Qabdesh Jumadiluly qarymdy shyǵarmashylyǵymen, qajyrly qaıratkerligimen qazaq ádebıetiniń damýyna qomaqty úles qosqan asa talantty tulǵa bolǵanyn atap ótti.

«Daraboz daryn ıesi óziniń mazmuny baı kóptegen áńgimeleri men hıkaıattary, keń tynysty epıkalyq romandary arqyly ulttyq prozanyń ósip-órkendeýine ólsheýsiz eńbek sińirip, qıly zamandarda túrli teperish kórgen qazaq halqynyń talaıly taǵdyry men tarıhyn, aýmaly-tókpeli tutas dáýirdiń kelbetin qapysyz somdady. Onyń sońynda qalǵan kesek týyndylary – ádebıetimizdiń altyn qorynda saqtalatyn shyn mánindegi qundy rýhanı qazyna.

Alash jurtynyń qaltqysyz qurmetine bólengen abzal azamattyń esimi men jarqyn beınesi jurtshylyq jadynan eshqashan umytylmaıdy dep senemin», –­ delingen jedelhatta.