Nursultan Nazarbaev «Hıetanıemı» memorıaldy keshenine gúl destesin qoıdy

  HELЬSINKI. QazAqparat - Fınlıandııaǵa resmı saparmen kelgen Qazaqstan Prezıdenti Nursultan Nazarbaev «Hıetanıemı» memorıaldy keshenine gúl destesin qoıý sharasyna qatysty, dep habarlaıdy QazAqparattyń arnaýly tilshisi Helsınkıden.

Qalanyń Teele aýdanynda ornalasqan «Hıetanıemı» memorıaldy kesheniniń irgetasy 1829 jyly  qalanyp, búgingi kúnge deıin ómirden ozǵan azamattardyń jer qoınyna tapsyrý orny sanalady. «Hıetanıemı» sózin fın tilinen aýdarǵanda «qumdy burym» degen maǵyna beredi. Memorıaldy keshen mundaı ataýǵa Helsınkıdiń ortalyǵynda ornalasqan múıiste bolýyna oraı alyp otyr. Keshende lıýteran, ıslam, pravoslav jáne evreı zırattary bar.

«Hıetanıemıde» 1939-1940, 1941-1944 jáne 1944-1945 jyldardaǵy soǵysta  qaza tapqan jaýyngerlerdiń zırattaryn qamtıtyn áskerı keshen de bar. Keshenniń dál ortasynda belgisiz jaýynger men marshal Karl Mannergeımniń zıraty ornalasqan.

Búginge deıin memorıaldy keshen aýmaǵyna Fınlıandııanyń 7 prezıdenti, tanymal sýretshiler, kompozıtorlar, jazýshylar, saıasattanýshylar jerlengen.  

Aıta keteıik, shet memleketter basshylarynyń Helsınkıge resmı sapar  barysynda «Hıetanıemı» memorıaldy keshenine gúl destesin qoıý sharasy ótkizilip turady.