Nursultan Nazarbaev halyqaralyq qaqtyǵystarǵa sebep bolǵandardy aıyptady
"Biz keıbir elderde ekonomıkalyq sanktsııalardy, protektsıonızmdi, lańkestikti, ekstremızmdi, turaqsyzdyqty baıqaýdamyz. Sondaı-aq táýelsiz elderge qarýly shabýyldar oryn alýda. Bul jaǵdaı halyqaralyq quqyqty buzyp, ǵalamshardaǵy barlyq turǵyndardyń erteńgi kúnge degen senimsizdik atmosferasyn uıalatady. Álemniń iri memleketteri arasynda senimgerlik joq. Olar negizinen beıbitshilik pen kelisim problemalaryn sheshýi tıis edi. BUU-da keliskenimizdeı, soǵys pen beıbitshilik máseleleri BUU irgesinde Qaýipsizdik keńesimen sheshiledi. Alaıda bul normalar saqtalmaı keledi", - dedi Memleket basshysy.
Elbasynyń paıymynsha, bul ahýal kedeıshilik, jumyssyzdyq problemalaryn ýshyqtyra túsýde. Nátıjesinde, ekonomıka ósimi tómendeýde, elderdiń teńsizdigi tereńdeýde. Al áleýmettik teńsizdik ekstremızmdi týdyrady, radıkaldy revolıýtsııalarǵa alyp keledi.
Osy oraıda N. Nazarbaev BUU málimetterine nazar aýdardy. Jer betindegi halyqtardyń 14 paıyzy asharshylyq qıyndyqtaryn sezinýde. Bunyń saldarynan álemde jyl saıyn 24 myń adam kóz jumady. Jumyssyzdar sany 200 mln adamǵa jaqyndady.