Nursultan Nazarbaev halyqaralyq áýejaıynda ótpeli galereıa ashyldy
Galereıanyń jalpy alańy 1000 sh.m., uzyndyǵy 90 metr. Jańa ótpeli galereıa áýejaı jolaýshylaryna dalaǵa shyqpaı-aq, bir termınaldan ekinshi termınalǵa ótýine múmkindik beredi.
Elordanyń áýe qaqpasy táýligine 200-ge deıingi reısti qabyldap, shyǵaryp salady, ári 14 000 jolaýshyǵa qyzmet kórsetedi. Buǵan deıin reısteri sáıkes kelgen tranzıtti jolaýshylar da búginge deıin bir termınaldan ekinshi termınalǵa ótý úshin dalaǵa shyǵýlaryna týra kelgen edi. Qysty kúni aıaz ben boran, jazdy kúni jańbyr jaýyp, jel soǵatyn elordanyń sýyq tabıǵatyn eskere otyryp, jabyq ótpe jol arqyly eki termınaldy qosý jóninde sheshim qabyldandy.
Qurylys jumystary kezinde kelýshilerdiń jaılylyǵyna qajet barlyq talaptar eskerildi. Ótpe jol barlyq kerekti ınfraqurylymmen jabdyqtalǵan ári ortalyq aǵyndyq jáne ınjenerlik júıelerge qosyldy. Ol degenimiz, qysqy maýsymda – jyly, jazǵy maýsymda salqyn bolyp turady. Budan ózge, eden astynan jylý berilip, jeldetý júıesi iske qosylǵan. Galereıada áýejaıdyń jáne tehnologııalyq protsesterge qatysatyn uıym qyzmetkerlerine arnalǵan bólek qyzmettik dáliz bar.
Qazirgi ýaqytta, nysan ishine arnaıy belgiler ornatylyp, kútip alýshylar men shyǵaryp salýshylar úshin jaıly oryndyqtar qoıyldy. Bıylǵy jyl sońyna deıin, ótpe jolǵa vendıngtik apparattar, tólem termınaldary men bankomattar ornatý josparlanǵan.
2018 jyly elorda áýejaıy 30 myń reıske qyzmet kórsetip, jolaýshylar aǵynyn 4,5 mıllıonnan asa jolaýshyǵa jetkizdi. Bıylǵy jyl sońyna deıin áýejaı 5 mıllıonynshy jolaýshyǵa qymet kórsetýdi josparlap otyr.
2019 jylǵy 10 aıdyń qorytyndysy boıynsha, jolaýshylar aǵyny 4,2 mln adamdy qurady. Bul kórsetkish 2018 jylǵy osy kezeńdegi qorytyndymen salystyrǵanda 7% -ǵa artyq. Reıster sany 26 myńnan asyp, ótken jylǵy osy kezeńmen salystyrǵanda 3 paıyzǵa kóbeıdi.
Qazirgi ýaqytta áýejaı 15 sheteldik jáne 5 otandyq áýe kompanııalarymen birge jumys jasaıdy.
Bıylǵy jyly jańa Praga, Ulan-Batyr, Tokıo halyqaralyq áýe baǵyttarynyń ashylýyna oraı, halyqaralyq baǵdarlarmen ushqan jolaýshylar sany 1.5 mln-nan asty.
Іshki baǵyttar boıynsha 2.7 mln jolaýshylarǵa qyzmet kórsetildi. Bul kórsetkish Shymkent, Taraz, Semeı, Pavlodar, Qostanaı baǵyttaryn ashqan «FlyArystan» áýe kompanııasynyń arqasynda júzege asty. Otandyq loýkoster jeltoqsanda «Nur-Sultan-Máskeý» baǵytyn ashýdy josparlap otyr.