Nursultan Nazarbaev elordada daýys berdi

ASTANA. QazAqparat – Qazaqstannyń burynǵy prezıdenti Nursultan Nazarbaev Májilis pen máslıhat depýtattaryn saılaýda óz tańdaýyn jasady, dep habarlaıdy QazAqparat tilshisi.

Nursultan Nazarbaev elordanyń «Astana Opera» teatrynda №393 saılaý ýchaskesinde daýys berdi jáne kelýshilerdi Naýryz merekesimen quttyqtady.

«Naýryz merekesi barshalaryńyzǵa, búkil halqymyzǵa jaqsylyq, kóktemniń jaryǵy men qýanyshyn ákelsin. Ár januıaǵa jaqsylyq tileımin, áýmın», - dedi Nursultan Nazarbaev.

Eske salaıyq, QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń - 69 depýtaty, bir mandatty aýmaqtyq saılaý okrýgteri boıynsha 29 depýtat saılanady.

19 qańtarda Memleket basshysy Qasym-Jomart Toqaev jetinshi saılanǵan Parlament Májilisin taratý jáne 19 naýryz kúni Parlament Májilisi depýtattarynyń kezekten tys saılaýyn belgileý týraly Jarlyqqa qol qoıǵan edi. Bul kúni Májilispen qatar máslıhat depýtattaryn da kezekten tys saılaý usynyldy.