Nursultan Nazarbaev: Eger biz kúshti bolsaq, bári de bizben sanasady

ASTANA. QazAqparat - Memleket basshysy Nursultan Nazarbaev respýblıkalyq telearnalar arqyly Qazaqstan halqyna arnalǵan málimdemesinde el aldyndaǵy aýqymdy mindetterdi atap ótti, dep habarlaıdy QazAqparat tilshisi.

«Qurmetti qazaqstandyqtar. Meniń súıikti otandastarym. Men búgingi sózimdi Sizderdiń árqaısyńyzǵa arnap otyrmyn. Elimizdiń aldynda aýqymdy mindetter tur. Jetistikke jetetinimizge senemin. Men Qazaqstannyń búgingi bolashaǵyn qalaı elestetemin? Bolashaq qazaqstandyqtar - bilimdi, úsh tilde sóıleıtin, erkin adamdardyń qoǵamyn qalyptastyratynyna senemin. Olar álemniń azamattary. Olar dúnıeni sharlaıdy. Olar jańa bilim alýǵa qushtar. Olar eńbeksúıgish. Olar óz eliniń naǵyz patrıottary. Qazaqstan 2050 jyly jalpyǵa ortaq eńbek qoǵamyna aınalady dep senemin. Bul bári de adam ıgiligi úshin jasalatyn, ekonomıkasy myqty memleket», - deıdi Memleket basshysy.

Prezıdent Qazaqstannyń bilim salasy da, densaýlyq saqtaý salasy da úzdik bolatynyn, beıbitshilik pen tynyshtyq quratynyn, azamattary erkin ári teń quqyly, bıligi ádiletti, zań ústemdik etetin memleket bolatynyn erekshe atap ótti.

«Men durys jolda kele jatqanymyzǵa kámil senemin. Bizdiń týra joldan eshteńe de taıdyra almaıdy. Eger biz kúshti bolsaq, bári de bizben sanasady. Eger biz áldeqandaı kúshke, basqa bireýge úmit artsaq, qol jetkizgen jetistikterdiń bárinen aıyrylamyz. Súıikti Otanymyz Qazaqstan jasasyn!», - dep túıdi sózin Nursultan Nazarbaev.

Foto: mod.gov.kz