Nursultan Nazarbaev EAEO elderine birigip ushaq shyǵarýdy usyndy

NUR-SULTAN. QazAqparat - Eýrazııalyq ekonomıkalyq odaq elderi birigip ushaq shyǵarýdy qolǵa alýlary kerek. Bul týraly búgin elordada ótip jatqan Joǵary Eýrazııa ekonomıkalyq keńesiniń keńeıtilgen quramdaǵy otyrysynda QR Tuńǵysh Prezıdenti - Elbasy Nursultan Nazarbaev aıtty, dep habarlaıdy QazAqparat tilshisi.

«Eýropalyq odaqtaǵy Airbus kontserni sııaqty qatysýshy elderdiń barlyǵyn biriktiretin jobalar qajet. Olar ıadroǵa aınalady. Bizdiń birlestikte óndiris jaǵynan da, tehnıkalyq áleýeti jaǵynan da Reseı mańyzdy oryn alatyndyǵyn moıyndaý kerek. Týra sol Airbus ushaqtary Eýropa elderiniń kópshiliginde shyǵarylady. Qosalqy bólshekteri anda, mynda dep kete beredi. Barlyq elder jumyldyrylǵan jáne barlyq el paıda taýyp otyr. Barlyq elder jumys oryndaryn usynady», - dedi QR Tuńǵysh Prezıdenti.

Sonymen qatar Elbasy Ońtústik Azııanyń ortaq avıatsııalyq kompanııasyn da mysalǵa keltirdi.

«Qysqa qashyqtyqtarǵa qatynaıtyn ózimizdiń ishki óńirilk ushaqtar jetispeıdi. Biz olardy shyǵara alamyz. Aýyl sharýashylyǵy úshin de avıatsııa jetspeıdi. Ony da ózimiz shyǵara alamyz», - dedi Nursultan Nazarbaev.

Joǵary EEK Qurmetti tóraǵasy qazirgi saýda soǵystary jaǵdaıynda naryqtardy ıgerýdiń jańa strategııasyn ázirleý qajettigine nazar aýdardy. Bul rette Amerıka men Qytaı arasyndaǵy saýda soǵysynyń saldarynan qytaı naryǵynda taýar tapshylyǵy oryn alatyndyǵy eske saldy.

«Osy olqylyqty zerdelep, nege ózimizdiń taýarlarymyzdy usynbasqa? Biz munan paıda ala alamyz. Osy jáne ózge de bastamalardy eskere otyryp, 2025 jylǵa deıingi jol kartasyn ázirleýdi usynamyn», - dedi Elbasy.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sooronbaı Jeenbekov, RF Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonymen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysyp otyr.

Jalpy otyrys barysynda Memleket basshylary EAEO damýynyń ózekti máseleleri men bolashaǵyn talqylaıdy. Atap aıtqanda, tsıfrlyq damýdyń, Odaqtyń halyqaralyq qyzmetiniń kún tártibinde turǵan máseleleri, sondaı-aq 2019-2020 jyldarǵa arnalǵan makroekonomıkalyq saıasattyń negizgi baǵdarlary qarastyrylady.

Sammıt sońynda Joǵary Eýrazııa ekonomıkalyq keńesine múshe memleketter basshylarynyń EAEO týraly Kelisimniń 5 jyldyǵyna oraı Birlesken málimdeme jasaýy, sondaı-aq birqatar halyqaralyq qujattarǵa qol qoıýy josparlanǵan.