Nursultan Nazarbaev densaýlyqty saqtaýdyń basty qaǵıdasyn atady
«Baqyttyń 90 protsenti - densaýlyqta. Bir jeriń aýyrsa, kóńil-kúıiń túsedi, bir nárseni isteýge qulshynysyń bolmaıdy. «Ómirdiń sapasy» dep osyny aıtady. Men ózim qazir densaýlyqqa qatysty barlyq zertteýlerdi baqylap otyramyn. Sonda ǵalymdardyń barlyǵy birdeı durys tamaqtanbaýdy basty másele retinde kórsetedi. Sondyqtan, durys tamaqtaný qajet. Osyny bárine jetkizý kerek», - dedi N.Nazarbaev.
Prezıdenttiń aıtýynsha, buryn elimizde júrek-qantamyr jáne onkologııalyq aýrýlar úlken problema boldy. Búginde jańa texnologııalardyń arqasynda júrek transplantatsııasyna deıingi otalar óz jerimizde jasalady. Shetelge baryp, emdelýdiń qajeti joq. Ana men bala ólimi azaıdy. Osylaısha, xalyqtyń ómir uzaqtyǵy artady.
«Qazir Astanada iri onkologııalyq ortalyqty salyp jatyrmyz. Ol jerde eń ozyq texnologııalardyń túr-túri bolady. Men ózim bárin zerdelep shyqtym. Sonyń arqasynda xalyqtyń ómir súrý uzaqtyǵyn jaqsartamyz», - dep atap kórsetti N.Nazarbaev.
Aıta keteıik, kezdesý kezinde QR Prezıdenti barsha analar men qyz-kelinshekterdi 8 Naýryz - Halyqaralyq áıelder kúnimen quttyqtady. «Ananyń qudireti sheksiz. «Onyń aldynda búkil dúnıe bas ıedi» dep tegin aıtylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtap, bitimge kelip otyrǵanyn bilemiz. Dástúrimizdi barynsha saqtap kele jatqan biz, áıel zatyn ásirese qadirleıtin xalyqpyz. Qazaq ulty qyz balany ár ýaqytta alaqanyna salyp, aıalap otyratyn. Bul saltymyz otbasy úshin buzylmas zańdylyqqa aınalyp keledi. «Ana» degen qasterli sózdi estigende tebirenbeıtin júrek joq, tolqymaıtyn kóńil bolmaıdy», - deıdi N.Nazarbaev.
Memleket basshysy kópbalaly otbasylarǵa kómek berý máselesin qozǵady.
Sondaı-aq, eki anaǵa anaǵa «Altyn alqa» men «Kúmis alqa» belgilerin saltanatty túrde tapsyrdy.
Prezıdent otbasynyń yntymaǵyn saqtaýdyń qupııasymen de bólisti.