Nursultan Nazarbaev: Búkil ómirimdi Qazaqstannyń táýelsizdigine arnadym
«Bizdiń qazirgi zamanda ǵalymdar, sarapshylar «barlyǵyn bilemiz, bárin de ıgeremiz» dep oılaıdy. Biraq eshkim osyndaı vırýs keledi dep oılaǵan joq. Bir jerden shyqty – ol endi tabıǵattyń qubylysy. Áli de ondaılar bolýy múmkin. Sondyqtan adam bárin ıgerdi, barlyǵyn bildi dep aıtýǵa bolmaıdy. Jastarǵa sózimdi ylǵı aıtyp kelem. Qazirgi aıtarym, men búkil ómirimdi Qazaqstannyń táýelsizdigine sarp etip kele jatyrmyn. Keńes ókimeti kezinde 5 jyl Qazaqstannyń úkimetin basqardym. 30 jyl Prezıdent boldym. 35 jyl boıy tynbaı, kúndiz-túni osy jumysty istep kele jatyrmyz. Elimizdiń, qazaqtyń, ata-babamyzdyń armany – táýelsizdik. Qolymyzǵa keldi. Ol bolmasa túk bolmaıdy. Ol bolmasa taǵy da bodan bolamyz. Ol bolmasa bizdiń tilimiz, dinimiz bolmaıdy. Ol bolmasa bizdi basqalar basqarady», - dedi Elbasy.
Nursultan Nazarbaev bul sózi nasıhat emes, shynymen jadynan, janynan aıtyp otyrǵanyn atap ótti.
«Jalpy qansha aıtsaq ta qazaq degen basqalarmen salystyrǵanda at tóbelindeı halyqpyz. Eki jaǵymyzda eki alyp memleket tur. Bir jarym mıllıardtyq Qytaı myna jaǵymyzda, Reseı myna jaǵymyzda. Olardyń saıasaty bolashaqta qalaı bolady? Men endi qolymnan kelgenshe shekarany shegendep, barlyq tóńirekpen dostyq qarym-qatynas jasadym. Qazaqstannyń jaýy joq qazir. Al zaman ózgeredi, el men jurt ózgeredi. Ne bolady? Sol táýelsizdigimizdi kóre almaı, qazirdiń ózinde kóz tigip otyrǵandar bar. Sebebi biz ekonomıka, reforma jaǵynan túp-tóńiregimizden ozyp kettik. Árıne, onyń bárine qyzǵanyshpen qaraıdy. Sondyqtan Táýelsizdigimizdi saqtap qalýymyz kerek», - dedi ol.