«Nursultan Nazarbaev: «Bolashaq» - bizdiń senimdi strategııalyq tańdaýymyz» - baspasózge sholý
«Egemen Qazaqstan» gazetiniń jazýynsha, keshe elordadaǵy Táýelsizdik saraıynda Bilim jáne ǵylym mınıstrligi men «Halyqaralyq baǵdarlamalar ortalyǵy» aktsıonerlik qoǵamynyń uıymdastyrýymen «Bolashaq» halyqaralyq stıpendııasynyń 20 jyldyǵyna arnalǵan «Bolashaq» stıpendıattary men túlekteriniń forýmy bolyp ótti. Oǵan aımaqtardan 1500-ge jýyq «Bolashaq» túlekteri, Prezıdent Ákimshiliginiń, sondaı-aq, el Úkimetiniń ókilderi men Parlament depýtattary, dıplomatııalyq ókildikterdiń basshylary, oqý oryndarynyń, ǵylymı ortalyqtardyń jetekshileri qatysty. Mereıtoılyq jıynǵa qatysýshylar «Qazaqstan-2050» Strategııasynan týyndaıtyn mindetterdi áńgime arqaýyna aınaldyryp, ótken 20 jyldyń qorytyndylaryn tilge tıek etti, osy oraıda alda atqarylar isterdiń kókjıegin aıqyndady. Forýmǵa Elbasy Nursultan Nazarbaev qatysyp, sóz sóıledi. Memleket basshysy óz sózinde forýmǵa qatysýshylardy «Bolashaq» baǵdarlamasynyń 20 jyldyq mereıtoıymen quttyqtady jáne onyń egemen Qazaqstan tarıhyna altyn áriptermen jazylatyn betterdiń biri ekenin atap ótti. «Aldaryńa úlken mindetter qoıyńdar. Sender óz eńbekterińniń jemisin jeıtin bolasyńdar. «Bolashaq» baǵdarlamasy - senderge memleket bergen senim nesıesi. Men senderdi, baǵdarlama túlekteri men stıpendıattaryn meniń Jalpyǵa Ortaq Eńbek Qoǵamy týraly ıdeıamnyń belsendi jaqtaýshylary retinde qarastyramyn. Esterińde bolsyn, kim jumys isteıdi, sol eshqashan jastyǵyn joǵaltpaıdy. Kim jumys isteýdi qoısa, ol otyzynda-aq qartaıady. Biz barlyq nársede úlgi bolýǵa tıispiz. «Qazaqstan-2050» - bizdiń HHІ ǵasyrdaǵy ulttyq ıdeıamyz. «Bolashaqtyń» negizinde «Qazaqstan-2050» qozǵalysyn qurýdy usynamyn. Jańa qozǵalys adamdarǵa elimizdiń negizgi mindetterin túsindirýi kerek. Árbir azamat Strategııany, onyń mindetteri men maqsattaryn túsinýge tıis. Barsha qazaqstandyqtarǵa birlik, toptasý jáne maqsatqa beriktik qajet. Sonyń barlyǵyn júzege sender asyrýǵa tıissińder. Bizdiń kúshimiz - birlikte, dedi Memleket basshysy. Maqala «Nursultan Nazarbaev: «Bolashaq» - bizdiń senimdi strategııalyq tańdaýymyz» degen taqyryppen berilnen.
Keshe Prezıdent janyndaǵy Memlekettik basqarý akademııasynda ekonomıka ǵylymdarynyń doktory, Reseı Federatsııasy Prezıdenti janyndaǵy Reseı Halyq sharýashylyǵy jáne memlekettik qyzmet akademııasynyń professory, Reseı Jaratylystaný ǵylymdary akademııasynyń akademıgi Anatolıı Spıtsyn memlekettik mereke - Qazaqstan Respýblıkasynyń Tuńǵysh Prezıdenti kúnine oraı «Nursultan Nazarbaevtyń álemdik ekonomıkanyń jańa modeliniń qalyptasýyndaǵy jáne qoǵamdy áleýmettik jańǵyrtýdaǵy strategııalyq bastamalary» taqyrybynda magıstranttar men doktoranttarǵa, professorlyq-oqytýshylar quramyna dáris oqydy. Osy shara arqaý bolǵan maqala el gazeti «Egemen Qazaqstanda» «Nazarbaevtyń el damýyndaǵy eńbegi eren» degen taqyryppen berilgen. Basylymnyń jazýyna qaraǵanda, ol Nazarbaevtyń sonaý 90-shy jyldary kóregendikpen aıtqan bastamalarynyń búgingi kúni qalaı oryndalyp otyrǵanyna mán berip, álemdik ıntegratsııalaný úderisinde de Qazaqstannyń árqashan óz bıiginen kórinip kele jatqanyna rızashylyǵyn jetkizdi. Postkeńestik kezeńde burynǵy odaqtastar iri «geosaıası apatty» - Keńester Odaǵynyń ydyraǵanyn bastan keship jatqanda, Nazarbaevtyń óńirlik ıntegratsııanyń negizgi qaǵıdattaryn ashyp kórsetip berýin nemen ólsheýge bolady, deı kele, ǵalym álemdik tarıhtyń damýynda kemeńgerlikpen bolashaqty kóre bilý qasıetiniń ekiniń biriniń mańdaıyna jazylmaıtynyn atap kórsetti. Al Prezıdent Nazarbaevtyń strategııalyq bastamalarynyń qundylyǵy onyń saıasatker-pragmatık retinde bolashaqty aldyn ala sezinýinde ǵana emes, onyń iri strateg jáne ǵalym, jańa órkenıettik mán-maǵynany tereń túsinetin kemeńgerlik qasıetterinde jatyr, dedi A.Spıtsyn.
«Aıqyn» gazetiniń búgingi sanynda Mońǵolııa Respýblıkasynyń eńbek sińirgen qaıratkeri, Mońgolııa Jazýshylar odaǵynyń múshesi Úzben Qurmanbaıulymen aradaǵy suhbat «Qazaqtyń máńgilik el bolaryna senemin» degen taqyryppen berilgen. Basylym tilshisiniń barlyq saýalyna tuşymdy jaýap bergen qalamger: «Memleket basshysy eki qazaq ózara qazaqsha sóılessin dep aıtty emes pe?! Odan artyq ne kerek? Búginderi eki qazaqtyń bir-birimen qazaqsha sóılesýiniń ózi muń bolyp tur emes pe? Men mysaly, kóshede, kólikte eki qazaqtyń bir-birimen oryssha sóılesetinin jıi kóremin. Avtobýsta kileń qazaqtar otyrsa da kondýktoryńyz aıaldamany oryssha habarlaıdy. Sol sebepti de Elbasy eń áýeli «eki qazaq qazaqsha sóılesip alyńdar» dep otyr ǵoı. Siz aǵylshyn tilinde sóılesetin eki japondy kórip pe edińiz? Joq. Qazaq tilinde sóılesetin eki qytaıdy baıqadyńyz ba? Joq. Tipti bazar mańyndaǵy syǵandar da ózara óz tilderinde sóılesedi. Al biz nege ózara óz tilimizde sóılespeımiz? Árıne, ekeýmiz qazir qazaqsha sóılesip otyrmyz. Al basshylyqta otyrǵan laýazym ıeleriniń bári birdeı bir-birimen memlekettik tilde sóılesip júrgen joq. Prezıdent «eki qazaq qazaqsha sóılessin» degendi biraz jyl buryn aıtty. Biraq ony oryndaýda jaıbasarlyq basym», deıdi.
Osy basylymnyń jazýynsha, Qazaqstan Respýblıkasy Parlamenti Senatynyń tóraǵasy Qasym-Jomart Toqaev Ujymdyq qaýipsizdik sharty uıymy Parlamenttik Assambleıasynyń Sankt-Peterbýrgte ótken altynshy otyrysyna qatysty. Qazirgi kezeńdegi UQShU-ǵa múshe memleketterdiń ujymdyq qaýipsizdigin qamtamasyz etý jónindegi qyzmeti týraly Uıymnyń Bas hatshysy Nıkolaı Bordıýja parlamentshiler aldynda baıandama jasady. Otyrysqa tóraǵalyq etýshi Reseı Federatsııasy Federaldyq Jınalysy Memlekettik Dýmasynyń Tóraǵasy Sergeı Naryshkın UQShU-nyń parlamenttik ólshemin damytý taqyryby boıynsha sóz sóıledi. Qatysýshylar UQShU ujymdyq qaýipsizdiginiń Kavkaz aımaǵyndaǵy áskerı-saıası ahýalyn zerdeleý nátıjeleri týraly esebin tyńdady. «Sankt-Peterbýrgte Q.Toqaev Reseı Federaldyq Jınalysy Federatsııa Keńesiniń Tóraǵasy Valentına Matvıenko jáne Reseı Federaldyq Jınalysy Memlekettik Dýmasynyń Tóraǵasy Sergeı Naryshkınmen ekijaqty kezdesýler ótkizdi. Reseılik áriptestermen áńgime barysynda Qazaqstan Senatynyń Tóraǵasy Ekaterınbýrg qalasynda eki memleket basshylary qol qoıǵan HHІ ǵasyrdaǵy tatý kórshilik jáne odaqtastyq týraly kelisim Qazaqstan - Reseı áriptestiginiń strategııalyq sıpatyn bekitkenin atap ótti. Ol Qazaqstan men Reseı Prezıdentteri eki el arasyndaǵy ózara odaqtastyq qatynastardyń ónegeli úlgisin qalyptastyrǵanyn jetkizdi», dep jazady basylym.