Nursultan Nazarbaev BAÁ-nyń Qazaqstandaǵy Elshisi Muhammed ál-Djabermen kezdesti
Kezdesýde Elbasy ekijaqty yntymaqtastyqty nyǵaıtýǵa qosqan úlesi úshin Qazaqstandaǵy dıplomatııalyq mıssııasyn aıaqtap jatqan Muhammed al-Djaberge alǵysyn bildirdi.
– Siz bizdiń elde úsh jarym jyl qyzmet ettińiz. Osy ýaqytta Qazaqstan men BAÁ qatynasy edáýir nyǵaıa tústi. Atap aıtqanda, memleketter arasynda vızasyz rejım engizildi. Sizdi Qazaqstannyń senimdi dosy dep bilemin. Aldaǵy ýaqytta da jaqsy qarym-qatynasta bolamyz degen senimdemin, – dedi Qazaqstannyń Tuńǵysh Prezıdenti.
Óz kezeginde Muhammed ál-Djaber Elbasyǵa jáne barsha Qazaqstan halqyna qonaqjaılyq kórsetip, jemisti yntymaqtastyq pen eki el arasyndaǵy qatynastardy damytýda jan-jaqty kómek bergeni úshin alǵys aıtty.
– Maǵan baýyrlas Qazaqstan Respýblıkasynda elshi bolý mártebesi buıyrdy. Siz ben BAÁ basshylyǵy arasynda dostyq qarym-qatynas ornaǵan. Meniń Qazaqstanǵa jáne onyń halqyna degen yqylasym erekshe. Elden jarqyn jáne umytylmas áser aldym. Dıplomatııalyq qyzmettegi alǵashqy laýazymymda «Qazaqstan mektebinen» ótkenimdi maqtan tutamyn, - dedi BAÁ elshisi.