Nursultan Nazarbaev áýejaıy tarıfterdi kóterý týraly Air Astana pikirine jaýap berdi
«Nursultan Nazarbaev halyqaralyq áýejaıy» AQ bıylǵy qyrkúıek aıynda Tabıǵı monopolııalar salasyndaǵy QR zańnamasynyń talaptaryna sáıkes ýákiletti memlekettik organǵa (QR IIDM Azamattyq avıatsııa komıteti) 2021-2025 jyldar kezeńine arnalǵan «Іshki áýe jelilerinde áýe kemesiniń ushyp-qonýyn qamtamasyz etý» qyzmeti boıynsha tarıfti bekitýge ótinim men ınvestıtsııalyq baǵdarlama jiberdi.
QR «Tabıǵı monopolııalar týraly» Zańynyń 15-baby 2-tarmaǵyna sáıkes ushý-qoný tarıfi bes jyl jáne odan kóp merzimge belgilenedi.
Óz kezeginde, zańnyń 21-baby 5-tarmaǵyna sáıkes ınvestıtsııalyq baǵdarlama tarıftiń qoldanylý merzimine qaraı bekitiledi. Investıtsııalyq baǵdarlama jobasy aıasynda ushý alańyn kútip ustaý men ushý qaýipsizdigi jumystaryn qamtamasyz etýge 48 arnaıy tehnıka men tetikterdi satyp alý josparlanǵan.
Qazirgi tarıf 2003 jyly belgilen jáne 17 jyl boıy ózgermegen. Tabıǵı monopolııalar týraly zańnamanyń qazirgi talaptaryn oryndaý úshin áýejaı ýákiletti organǵa tarıfterdi bekitý ótinimimen júginýge mindetti.
«Bul ótinimde COVID-19 pandemııasyna baılanysty áýejaı shyǵyndary, ushý-qoný jolaǵyn, perron men turaq oryndaryn kúrdeli jóndeýge josparlanǵan shyǵyndar eskerilgen joq», - dep atap ótti áýejaıdyń baspasóz qyzmeti.
Odan bólek, tarıfterdi ózgertý rásimi óte kóp jumysty qajet etedi: ótinimniń ózin daıyndaýǵa 6 aıdan astam ýaqyt kerek, munymen 5 bilikti maman jumys istedi jáne talap etiletin qujat kólemi 9 myńǵa jýyq paraqtan (8 896 bet) turady. Ýákiletti organ ótinimdi 180 kúntizbelik kúnde qarastyrady.
Nur-Sultan áýejaıyndaǵy retteletin tarıfter deńgeıi Qazaqstan men álemdegi basqa áýejaılarǵa qaraǵanda aıtarlyqtaı tómen. Máselen, atalǵan bir qyzmet quny álemniń basqa áýejaılarynda orta eseppen 3 ese joǵary (mysaly RF jáne kórshi elderdiń áýejaılarynda ushý-qoný quny 10 dollardan asady, al Nur-Sultanda 3 dollardan da az).
Sonymen birge, Nur-Sultan áýejaıy kommertsııalyq kásiporyn bolyp sanalady jáne basqa kásiporyndardy óz esebinen sýbsıdııalaı almaıdy. Memlekettik bıýdjetten tikeleı transhtar júrgizilmeıdi. Qazaqstan áýejaılaryndaǵy tarıfterdi turaqty ustap turý barlyǵyn – qaýipsizdik pen qyzmetkerlerdiń jalaqysyn únemdeýge májbúrleıdi. Áýejaı qyzmetkerleriniń jalaqy deńgeıi dál osyndaı fýnktsııalardy oryndaıtyn áýe kompanııalardyń qyzmetkerlerine qaraǵanda birneshe ese tómen.
Mundaı qarajat jetispeýshiligi jaǵdaıy bolashaqta ushý qaýipsizdigine, ınfraqurylymnyń jaı-kúıine jáne áýejaı qyzmetteriniń sapasyna keri yqpalyn tıgizedi. Áýejaılardy jabdyqtaý kerek.
Memlekettik baǵdarlamalardy iske asyrýdyń arqasynda astanalyq áýejaı barlyq álemdik standarttar boıynsha jabdyqtalǵan jáne zamanaýı arnaıy tehnıkalary bar. Áýejaı jyl saıyn sertıfıkattaýdan ótedi, trenıngter ótkizedi jáne qyzmetkerlerdi oqytady. Bul rette jerde qyzmet kórsetetin Air Astana qyzmetteri ýákiletti organdardyń sertıfıkattaýynan ótpeıdi.
«A.Qoshqarbaev myrzanyń ushý tarıfterin ustap turý boıynsha ishki rezervterdiń joqtyǵy týraly pikirine kelsek, biz avıakompanııanyń sheteldik menedjerlerine tólenetin bonýstar, joǵary lızıngtik mólsherlemeleri, BAQ qyzmetterin tóleýge jáne basqa da shyǵyndary túrindegi óz rezervteri jetkilikti dep esepteımiz. Áýe tasymaldaýshynyń osyndaı pikirlerinen keıin ýákiletti organnyń bizdiń ótinishimizge qatysty sheshimi obektıvti bolady dep úmittenemiz», - dep atap ótti Astana áýejaıynyń baspasóz qyzmeti.