Nursultan Nazarbaev Astana protsesine baǵa berdi
Astana klýbynyń úshinshi otyrysynda Avstrııanyń syrtqy ister mınıstri Benıta Ferrero-Valdner Qazaqstannyń Sırııa jónindegi kelissózderdiń beıtarap qatysýshysy retindegi pozıtsııasy týraly suraq qoıdy.
«Qazir álemdi tolǵandyratyn mańyzdy máselelerdiń biri - terrorızm. Úsh másele bar - terrorızm, ıadrolyq qarýsyzdaný jáne Soltústik Koreıa máselesi. Úsh máseleni de álemniń barlyq elderiniń birigýinsiz, ásirese AQSh, Reseı jáne Qytaı syndy uly derjavalardyń qatysýynsyz sheshý múmkin emes. Máselen, barlyq elder birikpeı, Soltústik Koreıa máselesi oń sheshimin tappaıdy. Alaıda, úsh derjava arasynda ekonomıkalyq jáne saıası máseleler boıynsha kelispeýshilikter bar. Sizder muny jaqsy bilesizder. Sol sebepti, bul másele bizdi de alańdatady, Sırııa - bizdiń aımaq, bizge alys emes», - dedi suraqqa jaýap bergen Memleket basshysy.
Elbasy jastardyń Sırııada soǵysýǵa ynta tanytyp jatatyndyǵyn atap ótti.
«Biz álemdik qaýipti jaǵdaıda ómir súrip jatyrmyz. Sondyqtan da men bul máselege únemi nazar aýdaryp turamyn. Bul elderde boldym, kóshbasshylaryn da bilemin jáne biz olarǵa, olar bizge únemi dostyq baılanystyń úlgisin kórsetip kele jatyr. Reseı, Túrkııa, Iran elderiniń basshylary kelissózder ótkizý úshin qolaıly alań dep bizge usynys jasaǵanda men birden kelistim», - dedi ol.
Sondaı-aq, Qazaqstan Prezıdenti kelissózder barysy jaıly aıtty.
«Kelissózder 7 kezeńde ótti, munda ol jaqta soǵysatyn jasaqtardyń komandırleri boldy, jalpy quram óte kúrdeli, pikirler de áralýan bolǵandyqtan kelissózder óte aýyr ótti. Biz bul áreketter arqyly joǵary jetistikterge jetemiz dep boljam aıtýǵa kelmeıdi, alaıda iste oń ilgerleýshilikter baıqalady. Sol sebepti biz álem úshin, DAISh -men kúres jolynda ıgilikti ister atqaryp jatyrmyz dep oılaımyn. AQSh bastaǵan koalıtsııa, Reseı, Túrkııa jáne Irannyń birikken jumysy óz nátıjesin berýde. Alaıda, ári qaraı ne bolatynyn oılaý kerek. Ol ár jerde beleń alýy múmkin. Birigý kerek», - dep atap ótti Memleket basshysy.
Aıta keteıik, 2017 jyldyń 13 qarashasy kúni Astanada Memleket basshysy Nursultan Nazarbaevtyń qatysýymen Astana klýbynyń úshinshi otyrysy ótti. Astana club - 27 eldiń 60-tan astam qatysýshysynyń basyn biriktirgen halyqaralyq pikirtalas alańy. Olar kórnekti saıası qaıratkerler, dıplomattar, belgili saıasattanýshylar, bedeldi ǵalymdar men AQSh, Reseı, Qytaı, Úndistan, Eýropa elderiniń, Taıaý Shyǵys, Ortalyq jáne Ońtústik shyǵys Azııa elderindegi jetekshi sarapshylar.