Nursultan Nazarbaev: Astana protsesi Sırııadaǵy soǵysty ishinara toqtatty

ASTANA. QazAqparat - Qazaqstan Prezıdenti Nursultan Nazarbaev Sırııadaǵy jaǵdaıdy retke keltirý maqsatynda Astanada ótip jatqan kelissózder týrasynda pikir bildirdi, dep habarlaıdy «QazAqparat» HAA tilshisi.

«Bul másele boıynsha Jeneva kelissózderi júrip jatyr. Onda kóptegen elder qatysýda. Olardyń bir kezderi tyǵyryqqa tirelip qalǵan kezderi de boldy. Sol ýaqytta Iran, Reseı, Túrkııa men ózge de elder Qazaqstannyń barlyq memlekettermen qarym-qatynasy jaqsy bolǵandyqtan, maǵan keldi. Kelissózderdi júrgizý alańy kerek edi. Biz kelisimimizdi berdik, kelissózder júrip jatyr, kelesi raýndy búgin bastalady. Osy kelissózderdiń arqasynda keıbir jerlerde soǵysty toqtatyp, deeskalatsııanyń úsh oshaǵyn qurýǵa múmkindik týdy. Beıbitshilik ornaı bastady», - dedi Aqordada tilshiler qaýymynyń suraqtaryna jaýap bergen Nursultan Nazarbaev.

Qazaqstan Prezıdentiniń sózine sáıkes, búgin deeskalatsııanyń kelesi alańy talqylanatyn bolady.

«Biz buǵan kóp úlesimizdi qosyp jatyrmyz dep oılaımyn. Sońǵy jyldary ol aımaqtardan 5 mıllıon adam bosyp ketti. 186 myń adam qyryldy dep aıtyp jatyr. «Ne úshin?» degen suraq týyndaıdy. Mine, sondyqtan, biz Qazaqstanda turaqtylyqty qadir tutamyz. Álemdik tarıhtyń eń áıgili eskertkishteri qırap qaldy. Mádenıeti tonaldy», - dedi Memleket basshysy.

Prezıdent taǵy da bul suraqtardy sheshýge Qazaqstan beıbit túrde shyqqanyn eske sala ketti.

«Menińshe, beıbitshilikke deıin áli alys sekildi. Biraq, ár memleket óz qarym-qabiletine qaraı úlesin qosýy kerek. Biz jumystaǵy óz bóligimizdi atqaryp jatyrmyz. Bul jumysty jalǵastyrý berýimiz kerek degen oıdamyn», - dedi Memleket basshysy.