«Nursultan Nazarbaev: Ásker yqsham ári utqyr bolýǵa tıis» - baspasózge sholý
***
«Egemen Qazaqstan» basylymynyń búgingi sanynda Bekbolat Tileýhannyń «Qazaq sportynyń qara nary» atty maqalasy jarııalandy. Materıal Parlament Májilisiniń depýtaty, «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» jáne ІІ dárejeli «Barys», «Halyqtar dostyǵy» ordenderiniń ıegeri, KSRO-nyń eńbek sińirgen jattyqtyrýshysy Temirhan Dosmuhambetov ómiriniń ónegeli tustary jaıynda bolyp otyr.
«Alla taǵala áý bastan nyǵmet bergen, Temirhan Dosmuhambetov otyzdyń bel ortasynda KSRO-nyń eńbek sińirgen jattyqtyrýshysy atanyp, odan ári Joǵarǵy Keńestiń depýtaty, eki márte Sport jáne týrızm mınıstri, eki márte Prezıdenttiń Іs basqarmasynyń basshysy, Astana qalasynyń ákimi qyzmetterin abyroımen atqardy. Temirhan Myńaıdaruly - Táýelsiz Qazaq eliniń aıaǵynan qaz turyp, álemge tanyla bastaǵan tusynda qara nardaı qaırat qylyp, beınet keshken úlken tulǵanyń biri. Elbasynyń qasynda júrip, Astana qurylysyna bilek sybana aralasty, jas qazaq memleketiniń eńsesin kóterýine atsalysty. Saıasattyń qyr-syryna qanyqty. Memleket jáne qoǵam qaıratkeri dárejesine kóterildi», - deıdi maqala avtory.
«Osy aptada ońtústik astanamyz Almatyda oryn alǵan ońdy oqıǵanyń bastysy «Qazaq eposy» ataýymen shyqqan anımatsııalyq fılmderdiń tusaýkeseri boldy», - dep habarlaıdy «Egemen Qazaqstan» gazeti.
Ulttyq naqyshtaǵy mýltfılmder jas urpaq tárbıesine asa qajetti quraldardyń biri ekeni aqıqat.
Basylymnyń jazýynsha, bul jınaqqa «Alpamys batyr», «Qobylandy batyr», «Er Tarǵyn batyr», «Qambar batyr» jáne qazaq halyq ertegilerine qurylǵan mýltfılmder engen. Mýltfılmderdiń jalpy hronometrajy - 400 mınýt.
«Tálim-tárbıe kilti - halyq pedagogıkasynyń negizinde deıtin joba avtorlary - mýltfılm keıipkerleri - Alpamys, Qobylandy, Er Tarǵyn, Qambar batyrlardyń erligin pash etetin qyzyqty sıýjetter jas býynnyń týǵan jerge degen mahabbatyn, Otanǵa degen súıispenshiligin oıatady dep otyr. Ulttyq qundylyqtardy nasıhattaıtyn otandyq týyndynyń tili jatyq, balanyń jas ereksheligine saı qurylǵan. Ár serııadaǵy qazaq maqal-mátelderiniń negizindegi oqytý elementteriniń sıýjetpen baılanystyra dybystalýy balanyń qazaq tiline degen qyzyǵýshylyǵy men til úırenýge degen yqylas-yntasyn arttyrady», - delingen «Ekrandaǵy epostyq etıýdter» atty maqalada.
«Keshe jedel-strategııalyq keńes ótkizgen Prezıdent, Joǵarǵy Bas qolbasshy Nursultan Nazarbaev Qorǵanys mınıstri Ádilbek Jaqsybekovten elimizdiń Qarýly kúshteri qatarynda sybaılas jemqorlyqty boldyrmaý jáne ony joıý baǵytynda pármendi sharalar qabyldaýdy talap etti. El qazynasynan bólingen ár teńge memlekettiń qaýipsizdigin kúsheıtýge qyzmet etýge tıis», - dep jazady «Aıqyn» basylymy «Nursultan Nazarbaev: Ásker yqsham ári utqyr bolýǵa tıis» atty maqalada.
«Qazaqstan óz aldyna mıllıondyq aýqymdy ásker qurýdy maqsat tutpaıdy, qazaqstandyq ásker yqsham ári utqyr bolýǵa tıis. Joǵarǵy Bas qolbasshy memleketimizdiń qorǵanynda bilikti mamandar men ultyna shyn berilgen azamattar turýǵa tıistigin nyqtady: «HHІ ǵasyrda Qarýly kúshter mamandardan, patrıottardan jáne ary taza azamattarymyzdan quralýǵa tıis!» dep mindettedi Elbasy. Áskerden qashanda temirdeı tártip, zamanaýı tehnıkany minsiz meńgerý jáne udaıy urysqa daıyn bolý talap etiledi. Memleket basshysy aıtqanyndaı, jerimizdiń shekarasyn aınala dostas elder qonystanǵanymen, álemde bas kóterip jatqan jańa qaterlerge el ázir otyrýy, toıtarýǵa qabiletti bolýy qajet», - delinedi gazettiń atalǵan materıalynda.
Seısenbi kúni Reseı Prezıdenti Vladımır Pýtın sheteldik jáne jergilikti aqparat quraldary ókilderin Novo-Ogarevo rezıdentsııasyna jınap alyp, Qyrym máselesine qatysty óz ustanymyn ashyq aıtqan bolatyn. «Túrkistan» basylymy osynda kóterilgen máseleler jaıynda tolymdy materıal jazyp otyr.
«Ýkraınadaǵy Qyrym túıtkili álemdik geosaıasattaǵy Reseıdiń roline áser etýi múmkin. Kreml buǵan deıin eshkimmen aqyldaspaı, burynǵy keńestik keńistikte óz betinshe áreket etip kelse, endi burynǵynyń kózden bul-bul ushqanyn moıyndaýy tıis. Seısenbi kúni Reseı Prezıdenti Vladımır Pýtın sheteldik jáne jergilikti aqparat quraldary ókilderin Novo-Ogarevo rezıdentsııasyna jınap alyp, Qyrym máselesine qatysty óz ustanymyn ashyq aıtýǵa májbúr boldy. Májbúrlik emeı nemene, qyryqtan astam suraqqa jaýap berý ústinde Pýtın Reseıdiń Qyrymdy Ýkraınadan bólip alý nıeti joq ekenin aıtyp, aqtalýmen boldy», - dep jazady basylym.
Ýkraına máselesine arnalǵan maqala «Sizben sosyn sóılesemiz» Pýtın suraq qoıdy ma, álde suraqtarǵa jaýap berdi me?» degen atpen jarııalanyp otyr.
«QR Prezıdenti Nursultan Nazarbaev QHR Syrtqy ister mınıstriniń orynbasary Chen Gopındi qabyldady», - dep habarlaıdy resmı tildi «Kazahstanskaıa pravda» basylymy «Idet podgotovka k sammıtý» atty maqalada.
Gazettiń jazýynsha, kezdesý barysynda ekijaqty qarym-qatynas pen áriptestik, sonymen qatar halyqaralyq kún tártibindegi máseleler talqynanǵan. Qarastyrylǵan taqyryptyń taǵy biri - Azııadaǵy Ózara Yqpaldastyq jáne Senim Sharalary jónindegi Keńestiń 2014 jyly mamyr aıynda Qytaı jerinde ótetin sammıti boldy. N.Nazarbaev sammıttiń daıyndyǵyna joǵary baǵa berip otyrǵandyǵyn jetkizdi.
Maqalada belgili bolǵanyndaı, qazirgi ýaqytta Qazaqstannyń Memleket Basshysy Qytaıǵa resmı saparmen barady dep josparlanýda. Chen Gopın atalmysh saparǵa qatysty N.Nazarbaevqa daıyndyq máseleleri jaıynda aıtyp berdi.