Nursultan Nazarbaev: Amerıka Qazaqstanǵa salynǵan ınvestıtsııa kólemi boıynsha 2-orynda

VAShINGTON. QazAqparat - Búgin Vashıngtonda Qazaqstan Prezıdenti Nursultan Nazarbaev AQSh-tyń iskerlik top ókilderimen kezdesti, dep habarlaıdy QazAqparattyń arnaýly tilshisi.

Elbasy kezdesý barysynda Qazaqstan men AQSh arasyndaǵy qarym-qatynastyń strategııalyq sıpatyna aıryqsha mán berip ótti.

«Amerıka Qazaqstan ekonomıkasyna salynǵan tikeleı ınvestıtsııa kólemi boıynsha ekinshi orynǵa ıe. Táýelsizdik jyldarynyń ishinde sizderdiń kompanııalaryńyzdyń tarapynan Qazaqstanǵa 50 mlrd dollardan astam ınvestıtsııa keldi. Ótken jyly elderimiz arasyndaǵy taýar aınalymy shamamen 2 mlrd  dollar boldy. Elimizde amerıkalyq kapıtaldyń qatysýymen energetıka, kólik, ınnovatsııa, medıtsına jáne basqa da salalarda 500-den astam kompanııa qyzmetin tabysty júzege asyrýda. Bizdiń iri seriktesterimizdiń arasynda  «Shevron», «Ekson Mobıl», «Djeneral Elektrık», «Hellıberton» jáne ózge de kompanııalar bar», - dedi Qazaqstan Prezıdenti.

Kezdesý sońynda avıatsııa men ǵaryshtyq zertteý, munaı hımııasy men aýyl sharýashylyǵy, sonymen qatar ınfraqurylymdyq damý salalaryndaǵy jobalardy júzege asyrýǵa baǵyttalǵan quny shamamen 7 mlrd dollardy quraıtyn ınvestıtsııalyq jáne saýda-ekonomıkalyq yntymaqtastyq týraly 20-dan astam kommertsııalyq kelisimge qol qoıyldy. Máselen, shamamen 1,5 mlrd dollarǵa avıatsııa jáne ǵaryshtyq zertteý salasyndaǵy tehnıkalar men qyzmetterdi satyp alý jónindegi kelisim jasaldy. Al AQSh-tyń Sheteldik jeke ınvestıtsııalar korporatsııasymen, Openhaımer jáne Goldman Saks kompanııalarymen birlesken ınvestıtsııalyq jobalar men saýda operatsııalaryn qarjylandyrý qujatynyń somasy 3 mlrd dollardy quraıdy. Sonymen qatar temir jol sektorynyń jobalary boıynsha Djeneral Elektrık Korporeıshnmen 1 mlrd dollardan astam somaǵa kelisimshart rásimdeldi.