Nursultan Nazarbaev álemdik kóshbasshy-reformatorlarmen bir qatarda tur - sarapshy
«Qazaqstan búgin kezekti márte Tuńǵysh Prezıdent kúnin toılap jatyr. Osynaý aıtýly data Táýelsizdiktiń 26 jyldyǵy qarsańynda ótkenge taǵy bir márte kóz júgirtip, derbes eldiń júrip ótken jolyna oı tastaýǵa úndeıdi», - deıdi sarapshy.
Tımýr Shaımergenovtyń paıymdaýyna qaraǵanda, álemdik tarıh úshin 26 jyl - bir ǵana sát bolǵanymen, Qazaqstan tarıhynyń kózqarasymen qarasańyz, osy kezeń memlekettiliktiń qalyptasýyna, el irgesiniń bekýine negiz bolǵanyn baıqaýǵa bolady.
«Álbette, ótken kúnderge búgingi tanymmen qarap otyryp, qandaı ýaqytta qandaı durys qadamnyń jasalǵanyn saraptaý da, tipti syn aıtý da ońaı. Biraq, toqsanynshy jyldary Nursultan Nazarbaev ta ondaı múmkindik joq edi. Jas memlekettiń kóshbasshysy retinde Memleket basshysyna óte durys tarıhı sheshim qabyldap, el damýynyń tıimdi jolyn tańdaý sharty turdy. Prezıdenttiń saıası kóshbasshylyǵy men aqyl tarazysyna sala otyryp memleketti basqarýynyń arqasynda Qazaqstan strategııalyq syndarǵa laıyqty jaýap berýmen birge, tipti qysyltaıań shaqta da el ıgiligine jarar jumystardy júzege asyryp úlgerdi», - deıdi Tımýr Shaımergenov.
Saıasat ǵylymdarynyń kandıdaty óz sózinde jahan tarıhynda modernızatsııa jolymen damý dańǵylyna túsý boıynsha tarıhı úlgiler barshylyq ekenin alǵa tartady.
«Ár kezeńde álem halqyn mundaı jetistikterimen Sıngapýr, Ońtústik Koreıa, Túrkııa, BAÁ, Malaızııa, Meksıka, Indonezııa, Brazılııa syndy elder de tamsandyrǵan bolatyn. Bul qatarǵa damýshy elderdiń ishinen jahandyq derjavaǵa aınalǵan Qytaıdy da qosýǵa bolady. Atalǵan memleketter aımaqtyq damýdyń draıverleri bola otyryp, halyqaralyq júıeniń ózgerýine septigin tıgizdi. Olardyń kóbi álemdik ekonomıkaǵa sózsiz áserin tıgizetin «alyp jıyrmalyqtyń» qatarynda. Al Qazaqstannyń jyl saıyn G20 kezdesýlerine shaqyrylýy da bizdiń respýblıkanyń progressıvti elge aınalǵanyn dáleldeı túsedi», - deıdi ol.
Sarapshy sonymen birge, joǵaryda atalǵan elderdiń árqaısysynyń damý joly ártúrli ekenin tilge tıek etti.
«Eger tarıh jáne geografııa, qoǵam jaǵdaıy men ekonomıkany esepke alyp, týra kózqaraspen Qazaqstanǵa qaraıtyn bolsaq, elimizdiń Táýelsizdik alǵaly beri júrip ótken joly ol memleketterdiń eshqaısysynan kem emes. Qazaqstan Prezıdenti óz suhbattarynda jeke kózqarasynyń qalyptasýyna Atatúrik, Sharl de Goll, Franklın Rýzvelt, M.Mohamad, Margaret Tetcher, Lı Kýan ıÝ sekildi áıgili qaıratkerler áser etkenin aıta otyryp, olardyń memleketti jańa deńgeıge jetkizgenin atap ótken edi. Osy rette Qazaqstannyń Tuńǵysh Prezıdenti óziniń jańǵyrtý jolynyń avtory retinde álemdik kóshbasshy-reformatorlarmen bir qatarda turǵanyn aıtýǵa bolady», - deıdi Tımýr Shaımergenov.
Ol sondaı-aq, Nursultan Nazarbaev eshqashan sheteldik, eýropalyq nemese amerıkalyq damý modelin kóshire salmaǵanyn eske saldy.
«Iá, bul negizinen tipti múmkin de emes - memleketter, saıası-ekonomıkalyq jaǵdaılar, tarıhı dáýir ártúrli edi. Alaıda álemdik tájirıbedegi memlekettik qurylymnyń birshama ámbebap qaǵıdattaryn irikteı otyryp, qazaqstandyq kóshbasshy ol joldardy ulttyq kontekstke sheber engize bildi. Tıimdi reformalar arqyly ońtaıly basqarýdyń ózindik modelin qalyptastyrdy. Jańǵyrtýdyń sáttiligi Tuńǵysh Prezıdenttiń memlekettik basqarýdaǵy modeline tikeleı baılanysty», - deıdi sarapshy.
Tımýr Shaımergenov óz sózinde «Nazarbaev modeline» - «kóshbasshylyq stıli, strategııalyq tásilder men basqarýshylyq sheshimderdiń, qysqa ýaqyt ishinde eldiń áleýmettik jáne memlekettik qurylymyn qalpyna keltire alatyn modeli» dep baǵa berdi.
«Búgin de biz «Nazarbaev modeline» Qazaqstan úshin barlyq «tuzaqtardan» aınalyp ótip, turaqty damý traektorııasyna jetkizgen tolyq basqarýshylyq tsıkl dep baǵa bere alamyz. Bul baǵa otandyq ıdeologııamen emes, bedeldi halyqaralyq uıymdardyń táýelsiz reıtıngterimen rastalyp otyr», - dep túıdi sózin Tımýr Shaımergenov.