Nursultan Nazarbaev álem elderi ratıfıkatsııalamaı otyrǵan halyqaralyq qujattardy atady

NUR-SULTAN. QazAqparat – Klımat jónindegi Parıj kelisimin áli de kóptegen taraptar ratıfıkatsııalaǵan joq. Bul týraly búgin Eýrazııa elderi parlamentteri tóraǵalarynyń IV keńesinde QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.

«Halyqaralyq qoǵamdastyq úshin zor máni bar halyqaralyq qujattardy ratıfıkatsııalaý isine belsendi túrde aralasý qajet. Máselen, 192 memleket qol qoıǵan Klımat jónindegi Parıj kelisimin áli de kóptegen taraptar ratıfıkatsııalaǵan joq. Biz ǵalamshardyń jylynyp, úlken apattyń jaqyndap kele jatqany jaıynda kúnde estımiz. Biraq, onyń aldyn alý úshin eshteńe de jasap otyrǵanymyz joq», - dedi Nursultan Nazarbaev.

Qazaqstannyń Tuńǵysh Prezıdenti ıAdrolyq synaqtarǵa jappaı tyıym salý týraly shart, ıadrolyq qarýǵa tyıym salý, ıadrolyq qaraýdy taratpaý jáne basqa da mańyzdy qujattar tóńireginde dál osyndaı ahýaldyń oryn alyp otyrǵanyna qynjylys tanytty.

«Barlyǵyn ıadrolyq qarýdan bas tartýǵa jáne taratpaýǵa shaqyra otyryp, ıadrolyq derjavalar bul qarýdy jetildirip, kompıýterlik oıyndar deńgeıinde synaqtan ótkizýi ádildik emes. Bul jumys istemeıdi. Eń aldymen ıadrolyq derjavalar mundaı bastamamen birinshi bolyp shyǵýy tıis. Onsyz is ilgerilemeıdi», - dedi Elbasy.