Nursultan Bekqaırov: Vaktsınalaý – koronavırýsty jeńýdiń jalǵyz joly

ALMATY. QazAqparat - «Jas Otan» jastar qanaty Almaty qalalyq fılıalynyń tóraǵasy Nursultan Bekqaıyrov QazAqparat tilshisine bergen suhbatynda indetke qarsy kúrestegi vaktsınatsııanyń mańyzdylyǵyn jan -jaqty toqtalyp ótti. Bul oraıda ekpe saldyrǵan tanystarynyń jaǵdaıy jaqsy ekendigin de aıta ketti.

- Siz vaktsınanyń eki komponentin de aldyńyz ba?

– Iá, men otandyq QazVac vaktsınasyn aldym. Alǵashqy dozasyn 28 sáýirde qabyldadym. Ekinshisin 19 mamyrda saldyrdym. Eki protsedýra da oıdaǵydaı ótti, eshqandaı aýyrsynǵan joqpyn. Qazir ózimdi jaqsy sezinemin. Biraq, vaktsına ár adamǵa ár túrli áser etýi múmkin. Ekpe saldyrǵan dostarymnyń ishinde dene qyzýy kóterilgender de boldy. Jalpy, vaktsına alǵan barlyq tanystarymnyń jaǵdaıy óte jaqsy.

- «Jas Otan» jastar qanatynyń Almatydaǵy fılıalynda qazir qansha adam ekpe saldyrdy?

- Biz jastarǵa vaktsınanyń mańyzdylyǵy týraly túsindirý jumystaryn júrgizdik. Vaktsına salmas buryn dárigerge qaralyp, keńes suraý kerektigin aıttyq. Búgingi kúni 100-den astam jasotandyqtar vaktsınanyń eki dozasyn aldy. Sondaı-aq, kóptegen adam alǵashqy komponentin saldyrdy jáne ekinshisin kútýde. Osy baǵytta túsindirý jumystaryn júrgize beremiz.

- Koronavırýsqa qarsy vaktsınanyń róli qandaı?

- Árıne, vaktsına týraly ártúrli áńgimeler bar, degenmen, vaktsına alý tek sizdiń ǵana emes, sonymen birge qoǵamnyń barlyq músheleriniń qaýipsizdigi ekeninin umytpaýymyz qajet.Sondyqtan ár adam bul ekpege jaýapkershilikpen qaraý kerek dep oılaımyn. Óıtkeni, álemdik tájirıbe kórsetkendeı, mundaı pandemııadan qutylýdyń eń tıimdi ádisi - bul jeke qorǵanys jáne vaktsınatsııa. Vaktsınatsııa – koronavırýs ınfektsııasyn jeńýdiń jalǵyz joly.

- Halyq arasynda vaktsınanyń tıimdiligine kúmánmen qaraıtyndar bar, oǵan ne sebep dep oılaısyz?

- Birinshi sebep - bul vaktsına týraly ártúrli áńgimelerdiń kesirinen. Bizge vaktsınatsııanyń mańyzdylyǵyn halyqqa jetkizý, túsindirý jumystaryn kúsheıtý kerek. Taǵy da, biz vaktsına týraly shynaıy aqparatty jan-jaqty taratýymyz qajet, eger onyń rasymen de jaǵymsyz áserleri bolsa, ony jasyrmaı ashyq aıtýymyz kerek dep sanaımyn.

Burynǵy qalypty ómirge tez oralý úshin ujymdyq ımmýnıtetti qalyptastyrý qajet. Sondyqtan men almatylyqtardy jáne barlyq otandastardy koronavırýsqa qarsy vaktsına egýge shaqyramyn. Ár adam jeke tulǵa, ár túrli saldary bolýy múmkin, sondyqtan vaktsına salmas buryn dárigerden keńes alyp, tekserýden ótken durys dep oılaımyn. Eger qarsy kórsetilim bolmasa, ekpe saldyrǵan durys.

– Áńgimeńizge raqmet!