Nurpeıis Baıǵanınniń «Narqyz» dastany tuńǵysh ret sahnalandy
Dastan jelisi boıynsha pesany Qazaqstannyń eńbek sińirgen qaıratkeri Joltaı Jumat jazdy. Bir saǵattan astam ýaqytqa sozylǵan qoıylym kórermen kóńilinen shyqty. Kórermender akterlardyń sheberligi men rejıssýraǵa rızashylyqtaryn bildirip, qoshemet kórsetti.
«Sóz sheberi, sózdiń has júırigi Nurpeıis Baıǵanınniń shyǵarmasynda búlkildep soǵyp turǵan qazaqtyń qany bar. Nurpeıis atamyzdyń jyrlary, dastandary, óleńderi, poemalaryn jyrshylar men jyraýlar jyrlaǵanymen, osy ýaqytqa deıin teatr sahnasyna shyqpaǵan eken. Bizdiń oıymyzda, júregimizde júrgen arman osy boldy. Táýekel etip, «Narqyzdy» qolǵa alyp, sahnalyq nusqasy jazyldy. Qoıylymdy Aqtóbe drama teatrynyń eń úzdik ártisteri usyndy. Avtor, dramatýrg retinde kózimnen jas tamatyndaı bolyp qaradym. Óz oılaǵanymdy sol kúıi sahnalady. Rıza boldym. Biz Nurpeıis atamyzdyń shyǵarmasyna qylaýdaı kirbiń túsirmeýimiz kerek. Shyǵarmany óńdep, jóndep, ózimizdiń oıymyzdy qospaýymyz qajet. Men de sol baǵytty ustandym»,- dedi dramatýrg Joltaı Jumat.
«Narqyz» tarıhı dramasynyń qoıýshy rejısseri Eltaı Kemal boldy. Qıyndyqtar men kedergilerge qaramastan tynbaı eńbek etken ujym búgin óz jetistikterimen bólisti.
«Elbasy Nursultan Nazarbaev «Bolashaqqa baǵdar: rýhanı jańǵyrý» baǵdarlamalyq maqalasyn jazdy. Bul - el men jerdiń rýhyn kóterýge úndeıtin maqala. Teatrdyń burynǵy dırektor Nurlybek Jubatqanǵa dramatýrg Joltaı Jumat habarlasqanyn aıtyp, «Narqyzdy» sahnalaý týraly oı bólisti. Men qýana qabyldadym. Jyr tyńdap ósken urpaqpyz, júregime jaqyn shyǵarma. Spektakldiń yrǵaǵyn batystyń minezine saı tókpe jyrmen berdim»,- dedi rejısser Eltaı Kemal.
Aıta keteıik, tarıhı dramada Kishi júzden shyqqan ónerli ári aqyldy, ór minezdi Narqyz esimdi batyr qyzdyń erligi men Orta júzdiń qol bastaǵan jas noıany Nııazdyń tapqyrlyǵy utymdy kórsetilip, eki ǵashyq arasyndaǵy baıandy mahabbat kórinis tapty. Narqyz rólin Ásem Qusaıynova, Nııazdyń rólin Jasulan Sımonov somadady. Sonymen qatar, Keńes Kemalbaev, Áset Orazalın, Nurbolat Óteǵulov, Tolaǵaı Karasaev, Eset Orazalın óner kórsetti.
«Bul qoıylymǵa kóp daıyndaldym. Sebebi, ózim názikpin, sahnada batyr qyzdyń rólin somdadym. Erkekshora qyzdyń obrazyn ashý úshin er adamdardyń minezin, sózderin baqylap, úırendim»,- dedi aktrısa Ásem Qusaıynova.
Elimizde alǵash ret sahnalanǵan «Narqyz» pesasyn Nurpeıis Baıǵanınniń balasy Momyn Baıǵanın de tamashalady.