Nurlybek Ojaev aýyldy jerlerdi qoldaýǵa qatysty usynystar aıtty
«Búginde elimizdegi jalpy turǵyndardyń 41 paıyzy nemese 7 mln halqy aýyldyq jerlerde turady. Aýyl - memlekettiń azyq-túlik qaýipsizdiginiń kepili, AÓK salasynda ınnovatsııalardy iske asyrý jáne ınvestıtsııalardy tartý ortalyǵy. Elbasy 2019 jyly bastamashy bolǵan jobanyń maqsaty aýyldaǵy turmys jaǵdaıyn jaqsartý bolatyn. «Nur Otan» partııasynyń 2025 jylǵa deıingi «Ózgerister joly: Ár azamatqa laıyqty ómir!» atty saılaýaldy baǵdarlamasymen osy joba aıasynda 3500 aýyldy jańǵyrtý qarastyrylǵan. Osy mindetti iske asyrý - aýyldyq jerlerdi keshendi damytýǵa jaǵdaı jasaıdy jáne aýyldyq eldi mekenderdiń kópshiligin óńirlik standarttarǵa jaqyndatýǵa múmkindik beredi. Bul týraly el Prezıdenti Qasym-Jomart Toqaev bıylǵy 1 qyrkúıektegi Joldaýynda atap ótti. Óńirlik standarttarǵa sáıkestendirý aýyz sýmen qamtamasyz etýdi, joǵary jyldamdyqty ınternetke qoljetimdilikti, turǵyn úı qurylysyn, jergilikti mańyzy bar sapaly joldardy, jaramdy ınjenerlik jelilerdi qamtamasyz etýdi bildiredi», - dedi N. Ojaev QR Premer-Mınıstrdiń birinshi orynbasary Álıhan Smaıylovtyń atyna joldaǵan saýalynda.
Depýtattyń paıymynsha, munyń bári, sapaly josparlaý jáne júıeli qarjylandyrý jaǵdaıynda múmkin.
«Al, is júzinde neni kórip otyrmyz? Jalpy, «Aýyl - El besigi» jobasyn josparlaý kezinde 2021 jyly 480 aýyldy jańǵyrtýǵa 135 mlrd teńge bólinip, 1 140 jobany iske asyrý kózdelgen bolatyn. Alaıda, 135 mlrd teńgeniń tek 106-sy ǵana bólindi, bul kózdelgen qarajattyń 78%-yn quraıdy. Bul jaǵdaıda oryndalmaǵan mindettemelerdi 2022 jyly aıaqtaýǵa da bolar edi, biraq 2022 jylǵa arnalǵan bıýdjet jobasynda qaralǵan josparly soma 570 aýyl úshin 130 mlrd ornyna tek 62 mlrd teńge ǵana qarjy kózdelýde, bul josparlanǵannan eki ese az. Mundaı resýrstarmen 2021 jylǵy tapshylyqty óteý túgili, tipti 2022 jyldyń mindetterin jartylaı oryndaý da múmkin bolmaıdy», - dedi ol.
Joǵaryda atalǵandardy eskere otyryp, «Nur Otan» partııasynyń fraktsııasy shuǵyl túrde:
- laýazymdy tulǵalardyń derbes jaýapkershiligin bekite otyryp, partııa baǵdarlamasyndaǵy maqsattardy bıýdjet jaǵynan qamtamasyz etýdegi olqylyqtardy joıý jáne aýyldyq óńirlerdi qoldaý jónindegi keshendi jospar ázirleýdi;
- bıýdjetti naqtylaý kezinde, merziminde jáne múltiksiz qamtamasyz etý maqsatynda «Nur Otan» partııasynyń Jol kartasyn qarjylandyrýdyń nysanaly kórsetkishterin eskere otyryp, taıaýdaǵy 3 jylǵa arnalǵan jobalar pýlyn usynýdy;
- bolashaqta jobalaý-smetalyq qujattamany josparlaý jáne ázirleý úshin qarjylandyrýdyń boljamdy lımıtterin óńirlerge aldyn ala jetkizýdi;
- óz kezeginde, jergilikti ákimdikter, oblystyq jol kartalary men aýmaqtardy damytý baǵdarlamalaryna sáıkes, bıýdjettik ótinimderdi ázirleý jumystaryn kúsheıtýdi talap etedi.