Nurlybek Nálibaev: Týystarymda jer bolsa, men ákim bolmaı turyp alǵan shyǵar

ASTANA. QazAqparat – Qyzylorda oblysynyń ákimi Nurlybek Nálibaev ortalyq kommýnıkatsııalar qyzmetinde ótken brıfıngide týystarynyń ıeligindegi jer telimderi týraly pikir bildirdi, dep habarlaıdy QazAqparat tilshisi.

«Jergilikti halyqtyń aıtýynsha, Qyzylorda oblysynda sizdiń týystaryńyzdyń menshiginde kóp jer bar kórinedi. Ol týraly ne aıtasyz?» dep surady BAQ ókili.

Oblys ákimi eger týystarynyń biri zańsyz jer ıemdengen bolsa, zań aıasynda qaıtarylatynyn aıtty.

«Siz ol másele boıynsha maǵan jazbasha saýal joldańyz. Bolmasa, quqyq qorǵaý organdaryna da berseńiz bolady. Olar tekserip, sizge aqparatyn beredi. Men sizdiń suraǵyńyzben kelispeımin. Alsa, kezinde zań aıasynda berilgen. Qarapaıym azamattar úlesker retinde alyp jatyr ǵoı. Biz ákim bolǵansha, osydan 20 jyl buryn alǵan shyǵar. Al basqa ondaı ıemdenip alyp qoıǵan jeri joq. Jazbasha joldasańyz, mindetti túrde jaýap beremiz», - dedi aımaq basshysy.

Sondaı-aq, ol óńirde paıdalanylmaı jatqan jer telimderin qaıtarý jumysy qarqyndy júrip jatqanyn atap ótti.

«Baǵana baıandamamda aıtyp kettim. Byltyr 157 myń gektardy memleket menshigine qaıtardyq. Bıyl 200 myń gektardan artyq jerdi qaıtaramyz dep josparladyq. Onyń ishinde bizdiń týys bola ma, basqa bola ma, zańsyz alsa, mindetti túrde memleketke qaıtarylady. Ony menen basqa da organdar qarap, qadaǵalap otyr», - dedi Nurlybek Nálibaev.