Nurlybek Nálibaev aýyldardaǵy 400-den astam turǵynnyń máselesin saralady

QYZYLORDA. QazAqparat – Qyzylorda oblysynyń ákimi Nurlybek Nálibaev árbir aýdandy aralap, turǵyndardyń ózekti máseleleri boıynsha jeke qabyldaý ótkizýdi qolǵa aldy. Búginge deıin 6 aýdanǵa arnaıy baryp, halyqty alańdatqan saýaldarǵa sala basshylarymen birge jaýap berdi. Bul týraly QazAqparat oblys ákiminiń baspasóz qyzmetine silteme jasap habarlaıdy.

Aldymen Jańaqorǵan, Aral óńirindegi turǵyndar máselesin saralaǵan oblys ákimi quqyq qorǵaý organdary basshylarymen birge Syrdarııa, Jalaǵash, Qarmaqshy, Qazaly aýdanyna da bardy. Munda 400-den astam azamat óz máselesin esh kedergisiz jetkizdi.

Jeke qabyldaýǵa oblystyq sot tóraǵasy Ádilhady Shyǵambaev, oblys prokýrory Nurlan Bıjanov, Ulttyq qaýipsizdik komıtetiniń Qyzylorda oblysy jáne Baıqońyr qalasy boıynsha departamentiniń bastyǵy Bolat Qalmyrzaev, oblystyq polıtsııa departamentiniń bastyǵy Muhtar Qojabaev, oblystyq ekonomıkalyq tergep-tekserý departamentiniń basshysy Baqyt Qaıshybekov keldi. Sondaı-aq, oblystyq sybaılas jemqorlyqqa qarsy is-qımyl departamenti basshysynyń mindetin atqarýshy Serikjan Myrzaly jáne memlekettik kirister departamentiniń basshysy Ǵanı Amanov qatysty.

Jergilikti azamattar jer telimderin rásimdeý, jaıylymdyq alqapty egistikke aýystyrý, jumysqa ornalasý, áleýmettik kómek alý, turǵyn úıge qol jetkizý, qaıtarymsyz grant alý syndy ózekti máselelerdi kóterdi.

Aımaq basshysy árbir máseleni sala mamandarymen birge muqııat zerdelep, zańdylyǵyna qaraı sheshim qabyldanatynyn aıtty jáne jaýapty basqarma basshylaryna naqty tapsyrmalar berdi. Quqyq qorǵaý organdary basshylary azamattarǵa zań aıasynda túsindirme berdi. «Halyq únine qulaq asatyn memleket» qaǵıdatyna negizdelgen mundaı kezdesýler jylyna eki márte uıymdastyrylmaq.

«Memleket basshysynyń qoldaýy negizinde óńirimizde jańa nysandar qurylysy men jobalar júzege asyp jatyr. Barlyq salalarda ilgerileý bar. Jaqynda ǵana túrkııalyq bedeldi «Aksa enerdjı» kompanııasymen birge quny 215 mlrd teńgeden asatyn, qala aýmaǵyn jylý jáne elektrmen tolyq qamtamasyz etetin, qýattylyǵy 240 megavat jylý elektr ortalyǵynyń irgetasyn qaladyq. Keler jyly quny 13,8 mlrd teńge bolatyn, jylyna 24 myń tonna tomat pastasyn shyǵaratyn zaýyt salamyz.

Óńirde 1,6 mlrd teńgege Neke saraıy, 3,7 mlrd teńgege 1 000 oryndyq Óner ortalyǵy, sol jaǵalaýda 2,7 mlrd teńgege Qan ortalyǵynyń irgetasy qalandy.

Jalaǵash aýdanynda 200 oryndyq Oqýshylar úıi men 50 oryndyq Óner mektebi paıdalanýǵa berildi. Jańaqorǵanda quny 790 mln teńge bolatyn zamanaýı demalys parki ashyldy. Syrdarııada, Naǵı Іlııasov aýylynda quny 350 mln teńgeni quraıtyn «Eńbekshiler parki» boı kóterdi. Teńizdi ólke Aralda «Balyqshylar monýmenti men alleıasy ashyldy.

Belgili kásipker Marat Dúısenbaevtyń demeýshiligimen quny 1,5 mlrd teńge bolatyn «Analar úıi» ortalyǵynyń qurylysy bastaldy.

Bolat Ótemuratovtyń qoldaýymen quny 12 mlrd teńge bolatyn «Qorqyt ata» áýejaıynyń jańa termınaly salynyp jatyr.

Óńirdiń Túrkistan oblysymen shektesetin tusynan demeýshi esebinen quny 200 mln teńgege oblystyń kireberis qaqpasy boı kótermek.

Balalar jylyna tartý retinde demeýshilerdiń qoldaýymen quny 1,6 mlrd teńge bolatyn 80 sport-oıyn alańyn baldyrǵandarymyzǵa tartý etti.

«Qazgermunaı» ulttyq kompanııasy basshylyǵymen kelisim nátıjesinde Qyzylorda qalasynda zamanaýı úlgidegi «Oqýshylar saraıynyń» jobasy bastalady.

5-6 aıdyń ishinde tek jergilikti kásipkerler 9 mlrd teńgege demeýshilik jasap, aýqymdy jobalardyń júzege asýyna qoldaý kórsetti.

Shyny zaýyty alǵashqy ónimin shyǵaryp, kórshi memleketke eksportqa shyǵarýǵa múmkindik aldy.

Keler jyly densaýlyq saqtaý salasynda 27 nysan salynady. Al, bilim berý baǵytynda «Jaıly mektep» jobasy sheńberinde 15 memlekettik mektep boı kóteredi. Sport janashyrlary úshin zamanaýı úlgidegi stadıon salýǵa nıettimiz», - dedi N. Nálibaev.