«Nurly jolǵa» bólingen bıýdjet qarajaty tolyq ıgeriledi

ASTANA. QazAqparat - Ortalyq memlekettik organdar jyl sońyna deıin «Nurly jol» memlekettik baǵdarlamasyna bólingen 89 mlrd teńgeni ıgerýleri qajet. Bul týraly búgin Úkimettiń selektorlyq rejimdegi otyrysynda QR Qarjy mınıstri Álıhan Smaıylov aıtty, dep habarlaıdy QazAqparat tilshisi.

«2018 jylǵy naqtylanǵan respýblıkalyq bıýdjette «Nurly jol» memlekettik baǵlarlamasyna 439 mlrd teńge qarastyrylǵan. 330 mlrd teńgesin ortalyq memlekettik organdar ıgeredi, al 109 mlrd teńgesi óńirlerge berildi. Onyń ishinde nysanaly transfertter - 73 mlrd teńge jáne bıýdjettik kredıtter - 36 mlrd teńge. Memlekettik baǵdarlamanyń ıgerilý barysy mınıstrlik tarapynan apta saıyn qadaǵalanyp otyr.

10 aıdyń qorytyndysy boıynsha respýblıkalyq deńgeıde 335 mlrd teńge ıgerildi, ıaǵnı bul esepti kezeń  josparynyń  99,5 jáne jyldyq jospardyń 76,3 paıyzy. Bıýdjetti naqtylaýdy eskere otyryp, jyl sońyna deıin ortalyq memlekettik organdar 89 mlrd teńgeni ıgerýi qajet», - dedi mınıstr.

Onyń dereginshe, Qazaqstannyń zamanaýı kóliktik ınfraqurylymyn qalyptastyrý, turǵyn úı-kommýnaldyq sharýashylyqtyń ınfraqurylymyn jáne jylýmen, sýmen jabdyqtaý, sý burý júıelerin jańǵyrtý baǵyttary boıynsha memlekettik baǵdarlamaǵa bólingen qarjylar esepti kezeńde tolyq ıgerilgen. Halyqaralyq qarjy uıymdarymen birlesken jobalar boıynsha  1,1 mlrd teńge  ıgerilmegen.

«Bul qarajattyń 0,7 mlrd teńgesi Bilim jáne ǵylym,  0,4 mlrd teńgesi Aýyl sharýashylyǵy jáne 0,04 mlrd teńgesi Ulttyq ekonomıka mınıstrlikterine tıesili», - dedi ol.

Álıhan Smaıylovtyń sózine qaraǵanda, esepti kezeńniń 1 qarashasyna óńirlerge  93 mlrd teńge nysanaly transferter men kredıtter bólindi. Atalǵan somanyń 91 mlrd teńgesi ıgerildi.  Eń kóp ıgerilmegen  somanyń  733,3 mln teńgesi Soltústik Qazaqstan, 358,7 mln teńgesi Qyzylorda, 233,1 mln teńgesi Mańǵystaý jáne 156,2 mln teńgesi Jambyl oblystaryna tıesili.

«Respýblıkalyq bıýdjetti naqtylaý barysynda jalpy memlekettik baǵdarlama boıynsha 37,5 mlrd teńgege táýekelder anyqtalyp, olar qysqartyldy. Biraq, Bilim jáne ǵylym  mınıstrligine «Ónimdi ınnovatsııalardy yntalandyrý» bıýdjettik baǵdarlamasynyń jyldyq somasyn 4,5 mlrd teńgege qysqartqanyna qaramastan, áli de bolsa 2,5 mlrd teńgege mindettemeler qabyldaýy qajet. Bul somanyń 96 paıyz syrtqy qaryzdar esebinen qarjylandyrylady.  Sondyqtan, Bilim jáne ǵylym mınıstrligi Dúnıejúzilik bankke qarajatty alýǵa tapsyrysty ýaqtyly berip, grant alýshylarǵa qarajatty aýdarýdy jyldamdatýy tıis. Ortalyq jáne jergilikti organdardyń málimetterine jyl sońyna deıin sáıkes memlekettik baǵdarlama boıynsha qarajatty tolyq ıgerilýi kútilýde», - dedi mınıstr.