«Nurly jol» úkimet aldyna zor mindetter qoıyp otyr

ASTANA. QazAqparat - Memleket basshysy Nursultan Nazarbaev «Nurly jol - bolashaqqa bas­tar jol» atty jańa ekonomıkalyq saıasatqa negizdelgen Joldaýynda Úkimettiń aldyna naqty mindet qoıylyp otyrǵandyǵyn aıryqsha atap ótti. Bul sheshimder aıasynda barlyq áleýmettik mindettemeler tolyq kólemde qamtamasyz etilmek.

Álemdik deńgeıdegi syn-qaterler yqtımaldyǵy jaǵdaıynda el ekonomıkasynyń ornyqty damýyn basty nazarda ustaı otyryp, Elbasy «Nurly jol» jańa ekono­mıkalyq saıasatyn usyndy. Jańa baǵdarlamada Úkimetke úlken mindet júktelip otyr. Osyǵan baılanysty Premer-mınıstr Kárim Másimov Úkimettiń jedel otyrysyn ótkizip, onda Memleket basshysynyń «Nurly jol - bolashaqqa bastar jol» atty Qazaqstan halqyna joldaýynda jarııalanǵan tapsyrmalardy iske asyrý sharalarynyń keshendi jospary qaraldy.

«Bizdiń mindetimiz - el Prezıdenti bergen tapsyrmalardy qysqa merzimde ári sapaly oryndaý», - dedi Kárim Másimov Úkimet múshelerine qarata aıtylǵan sózinde. Premer-mınıstr tapsyrmalardyń aýqymdy ekenin jáne olardy iske asyrý merzimderi de naqty kórsetilgenin, sondyqtan «arqany keńge salýǵa ýaqyttyń joq» ekenin basa aıtty. Osyǵan baılanysty Úkimet basshysy tıisti memlekettik organdardyń basshylaryna birqatar shuǵyl tapsyrmalar berdi. «Memleket basshysy Ulttyq qordan 2015-2017 jyldary ár jyl saıyn 3 mlrd. AQSh dollaryna deıin qosymsha qarajat bólý kerektigin jarııalady. Ulttyq ekonomıka, Qarjy jáne Ádilet mınıstrlikteri ózge de múddeli organdarmen birlese otyryp, tıisti normatıvtik-quqyqtyq aktilerdiń jobalaryn daıyndasyn jáne olar aǵymdaǵy jylǵy 14 qarashada Úkimet otyrysynda qaralsyn», - dedi K.Másimov. Sondyqtan atalǵan vedomstvolar jobalardy qysqa merzimde ázirlep úlgerýleri tıis.

Sondaı-aq, Premer-mınıstr Ulttyq ekonomıka mınıstrligine aǵymdaǵy jylǵy 10 jeltoqsanǵa deıin 5 jylǵa arnalǵan Infraqurylymdyq damý josparynyń jobasyn Úkimet qaraýyna engizýdi tapsyrdy. Atalǵan jospardyń naqty baǵyttaryna jaýap beretin múddeli mınıstrlikterge 20 qarashaǵa deıin taqyryptyq bólimderdiń jobalaryn usyný júkteldi. Premer-mınıstr Ulttyq ekonomıka mınıstrligine ústimizdegi jylǵy 1 jeltoqsanǵa deıin kásipkerlik sýbektilerdi qarjylandyrýdy qamtamasyz etý boıynsha Úkimet pen Ulttyq banktiń birlesken is-qımyl josparyn bekitý týraly qaýly jobasyn daıyndaýdy tapsyrdy. Sonymen qatar, Kárim Másimov Ulttyq ekonomıka mınıstrligine Prezıdent Ákimshiligimen jáne múddeli memlekettik organdarmen birlese otyryp, Elbasy Joldaýyn iske asyrý jónindegi Jalpyulttyq jospardyń jobasyn ázirlep, ony Úkimettiń kelesi otyrysynda qaraý týraly tapsyrma berdi. Prezıdenttiń Joldaýda berilgen árbir tapsyrmasy - bul árbir basshynyń jeke jaýapkershiligi. Bul rette Memleket basshysy aıtqandaı, alǵa qoıylǵan mindetterdiń sapaly ári merziminde oryndalýyna talap óte qatań bolatynyn Úkimet basshysy erekshe atap kórsetti. «Biz jumystyń úılesimdiligi men Ulttyq qordan bólingen qarajattyń tıimdi ári utymdy ıgerilýin qamtamasyz etýimiz kerek. Mindetter aýqymy keń, biz olardy ýaqytyly iske asyrýymyz kerek», - dedi K.Másimov.