«Nurly jol»: «Ortalyq-Ońtústik» baǵyty 1289 shaqyrymdy qurap otyr

  ASTANA. QazAqparat - Investıtsııalar jáne damý mınıstriniń keńeshisi-Aqparattyq qamtamasyz etý departamentiniń dırektory Berik Ýálı Feısbýktegi paraqshasy arqyly «Nurly jol» sheńberinde júzege asyrylyp jatqan Ortalyq-Batys, Ortalyq-Shyǵys jáne Ortalyq-Ońtústik baǵytyndaǵy avtojol jobalaryn tanystyrdy, dep habarlaıdy QazAqparat.

Memlekettik baǵdarlama aıasynda salynyp jatqan eń aýqymdy jobalardyń biri - «Ortalyq-Ońtústik» baǵyty. Avtojoldyń jalpy uzyndyǵy - 1289 shaqyrym, jalpy quny - 880 mlrd. teńge. Qurylys jumystary 2013 jyly bastaldy.

Qazir osy baǵyt boıynsha Astana-Qaraǵandy arasyndaǵy avtojol bitýge jaqyn. Astana men Temirtaý baǵytyndaǵy jol paıdalanýǵa berilip, endigi rette Temirtaý men Qaraǵandy arasyndaǵy jol salynyp jatyr. Astana-Qaraǵandy baǵyty boıynsha joldyń jalpy uzyndyǵy - 185 shaqyrym, onyń búginde 171 shaqyrymy paıdalanýǵa berildi. Jobanyń jalpy quny - 129 mlrd. teńge, onyń 112 mlrd. teńgesi ıgerildi.

Osy baǵyt boıynsha aldaǵy jyldary Qaraǵandy-Balqash (403 shaqyrym), Balqash-Býrylbaıtal (297 shaqyrym), Býrylbaıtal-Qurty (228 shaqyrym), Qurty-Qapshaǵaı (67 shaqyrym) joldarynyń qurylysy bastalady. Al, jalpy uzyndyǵy 104 shaqyrymdy quraıtyn Almaty-Qapshaǵaı avtojolynyń qurylysy 2016 jyly aıaqtalyp, paıdalanýǵa berildi. Tolyq aqparat ınfografıkada kórsetilgen.