«Nurly jol»: Qostanaı oblysynda 515 shaqyrym avtojol jóndeledi
Elimizde 2020-2025 jyldarǵa arnalǵan «Nurly jol» memlekettik baǵdarlamasy aıasynda oblystyq jáne aýdandyq mańyzy bar joldar qalypqa keledi. Baǵdarlamany iske asyrýdyń alǵashqy jyly respýblıkalyq jáne jergilikti mańyzy bar 9,5 myń shaqyrym avtojol jóndeý jumystarymen qamtylamaq.
Onyń ishinde respýblıkalyq joldardyń 4 myń shaqyrymynda qurylys jáne qaıta jańartý jumystary júrgiziledi, 1,5 myń shaqyrymy tolyq jóndelse, 4 myń shaqyrym jergilikti mańyzdaǵy jol retke keledi. Al Qostanaı oblysynda «Nurly jol» memlekettik baǵdarlamasy aıasynda 515 shaqyrym tas jol jóndeýden ótedi.
«Jol salasyna qatysty 350 joba iske asyrylyp, 30,5 myń adam jumyspen qamtylady. Bul maqsatqa 680 mlrd teńge qarastyrylǵan. Máselen, «Nurly jol» arqyly kópten beri turalap qalǵan «Qarabutaq-Qostanaı» tas jolyn jóndeý jobasy jandanady. Merdiger uıymdar Rýdnyı qalasynan Denısov aýylyna deıin jol-qurylys jumystaryn júrgizýdi josparlaýda.
Joldyń jalpy uzaqtyǵy 114 shaqyrymdy quraıdy. Atalǵan ýchaskede jumys qyzý júrip jatyr, jer tóseminiń qurylymy, jol qabatynyń sapaly tóselýin bizdiń mekeme baqylaýda ustaıdy. Asfaltbetondy qospanyń jáne kernniń synamalary alyndy. Olar kelesi synaqtar úshin fılıaldyń synaq zerthanasyna tasymaldandy» -deıdi Abylaıhan Alshynbaev.
Oblysta byltyr ǵana ashylǵan jol ortalyǵy respýblıkalyq jáne jergilikti mańyzy bar avtomobıl joldarynda únemi tekserý júrgizip otyrady. Qazirdiń ózinde 624 tekserý ótkizip, 593 ereje buzýshylyqty anyqtady. Zerthanalyq taldaýdan soń jol qurylysynda paıdalanylyp jatqan 81 materıalǵa tyıym salyndy. Qazir osyndaı 28 synama tekseristen ótýde.