Nurly jol: Qostanaı oblysynda 465 shaqyrym jol jóndeledi
Qostanaı oblysy jolaýshylar kóligi jáne avtomobıl joldary basqarmasy basshysynyń orynbasary Alekseı Kostıýkovtyń aıtýynsha, qazir aýdandyq, oblystyq mańyzy bar birqatar ýchaskedegi jumystar aıaqtalǵan. Atap aıtqanda, Qostanaı aýdanynda Ozernyı jáne Shemınov aýyldarynyń arasy, Naýyrzym aýdanynda Qarameńdi-Razdolnyı-Aralkól baǵyty, Amangeldi aýdanyndaǵy Baıǵabyl aýylyna kirer jol, Beıimbet Maılın aýdanynda Tobyl-Áıet-Krasnoselskıı-Naberejnyı jobasy, Jitiqara-Qamysty-Lılanov joly, Sarykól aýdanynyń Ýrojaınyı jáne Qoskól-Komsomolskıı aýyldaryna kireberister jóndelgen. Memlekettik baǵdarlama boıynsha iske asyrylatyn 37 jobanyń 20-sy bıyl jyl sońyna deıin aıaqtalady. Qalǵany aldaǵy jyly jalǵasady. «Nurly jol» arqyly jol jobalaryna 18,6 mıllıard teńge baǵyttalady. 2020 jyly oblystyq jáne aýdandyq mańyzy bar 465 shaqyrym jol jóndelýi kerek. Jyl basynan beri 291 shaqyrym asfaltbeton jabynyn frezerleý jumysy atqaryldy. Beıimbet Maılın, Qarabalyq, Qarasý, Uzynkól, Arqalyq, Amangeldi jáne Áýlıekól, Altynsarın, Sarykól jáne Meńdiqara aýdandarynda jol ýchaskeleri jóndeldi. Sondaı-aq eski qyrtysqa jańa materıal aralastyra otyryp, 239 shaqyrym joldyń 194 shaqyrymyna betondy asfalt jabyny tóseldi. Jumystar «Nurly jol» jáne «Jumyspen qamtý-2020» baǵdarlamalary arqyly qolǵa alynǵan.
«Joǵaryda atalǵan joldardyń boıyndaǵy 38 sý ótkizý qubyry aýystyryldy. Respýblıkalyq mańyzǵa ıe joldardyń tehnıkalyq jaǵdaıyn qalpyna keltirý jáne kútip ustaý úshin avtomobıl joldary ortasha jóndeýden ótedi. 20 myń shaqyrym joldyń shuńqyry bitelip, 3 myń sharshy metri resaıklıng tásilimen qalypqa keltiriledi. Joldaǵy jumystar ýaqytyly ári sapaly júrgizilýi úshin tekserilip otyrady», - deıdi Alekseı Kostıýkov.