«Nurly jol» Qazaqstandy ınfraqurylym sapasy boıynsha álemniń kóshbasshy 50 eliniń qataryna qosýǵa baǵyttalǵan - Elbasy

ASTANA.QazAqparat - «Nurly jol» Qazaqstandy ınfraqurylym sapasy boıynsha álemniń kóshbasshy 50 eliniń qataryna qosýǵa baǵyttalǵan. Bul týraly búgin «Infraqurylym: ekonomıkanyń ornyqty ósiminiń draıveri» taqyrybyndaǵy VIII Astana ekonomıkalyq forýmynyń jalpy otyrysynda Elbasy Nursultan Nazarbaev aıtty.

«Osydan 15 jyl buryn biz ıen dalada búgin ózderińiz kórip otyrǵan jańa astanamyz - Astana qalasyn saldyq. Qala qazaqstandyqtardyń maqtanyshyna ári bizdiń elimizdiń ekonomıkasynyń ósim draıverine aınaldy jáne qazaqstandyqtardyń múmkinshiligin kórsetti. Biz elimizde de jahandyq problemalardyń jaýabyn tabýǵa tyrysýdamyz», - dedi Elbasy. Memleket basshysy ol úshin Qazaqstannyń 2030, odan keıin 2050 jylǵa deıingi damýynyń strategııalyq jospary ázirlengenin eske salyp ótti. «Bizdiń jahandyq ekonomıkadaǵy daǵdarysqa naqty jaýabymyz «Nurly jol - bolashaqqa bastar jol» baǵdarlamasy men ındýstrıaldy-ınnovatsııalyq damýdyń jalpy qamtymdy memlekettik baǵdarlamasy bolyp tabylady. Bizdiń «Nurly jol» baǵdarlamamyz Qazaqstandy ınfraqurylym sapasy boıynsha álemniń kóshbasshy 50 eliniń qataryna qosýǵa baǵyttalǵan», - dedi QR Prezıdenti. N.Nazarbaev osy rette elimizdiń jer kólemi boıynsha álemde 9-shi orynda turǵanyn forým delegattarynyń qaperine salyp ótti.