«Nurly jol» boıynsha mektepter men balabaqshalardyń qurylysyna qarjy kólemi artty

ASTANA. QazAqparat - QR Ulttyq ekonomıka mınıstri Tımýr Súleımenovtiń aıtýynsha, aǵymdaǵy jyly jol qurylysyna 143,5 mlrd. teńge bólindi, dep xabarlaıdy QazAqparat tilshisi.

"Ótken jyly jol qurylysyn damytýǵa 151,6 mlrd.  teńge bólingen bolatyn. Atalǵan qarajat tolyǵymen ıgerildi. Osynyń nátıjesinde Astana-Temirtaý, Almaly - Qapshaǵaı jáne Astana - Petropavl tas joldarynyń qurylysy aıaqtaldy", - dedi Súleımenov Úkimettiń búgingi otyrysynda.

Budan bólek, ótken jyly ınfraqurylym jelilerin damytýǵa 77,9 mlrd. teńge bólinse, aǵymdaǵy jyly osy maqsattaǵy qarjynyń kólemi 57,4 mlrd. teńgeni qurap otyr.

Al mektepter men balabaqshalardyń qurylysyna bólinetin qarajattyń mólsheri bıyl artqan. Bilim berý mekemelerin salýǵa 80 mlrd. teńge bólinip otyr. Ótken jyly osy maqsatqa 57,4 mlrd. teńge jumsalǵan.

Mınıstrdiń sózine qaraǵanda, byltyr turǵyn úı qurylysyn damytýǵa 192 mlrd. teńge bólingen. Sonyń 148,2 mlrd. teńgesi tolyǵymen ıgerildi.

"Negizi, qurylys jumystarynyń erekshelikterine baılanysty qarjyny ıgerý merzimi 2 jyldy qurap otyr. Degenmen, ótken jyly 225,3 myń sharshy metr turǵyn úı paıdalanýǵa berildi. Onyń bári 3 600 páterdi quraıdy. Búginde "Nurly jer" baǵdarlamasynyń qabyldanǵany belgili. Sondyqtan atalǵan baǵdarlama aıasynda osy baǵyttaǵy sharalar budan ári de atqarylatyn bolady", - dep atap kórsetti Súleımenov.