«Nurly jol» - bolashaqqa bastaıtyn jarqyn jol - professor Ajar Baeshova

ALMATY. QazAqparat- QR Prezıdentiniń bıylǵy jańa Joldaýy halyqtyń ál-aýqatyn kóterýge jáne memleketti nyǵaıtýǵa baǵyttalǵan. Bul týraly búgin QazAqparat tilshisine ál Farabı atyndaǵy Qazaq ulttyq ýnıversıtetiniń jalpy jáne beıorganıkalyq hımııa kafedrasynyń professory Ajar Baeshova málimdedi.

Onyń aıtýynsha, Joldaýda «Qazaqstan-2050» strategııasyn júzege asyrý mindetteri aıqyn kórsetilgen. Prezıdent birinshi kezekte patrıotızm máselesine erekshe kóńil bólgen jáne aldaǵy ýaqytta «Máńgilik el» patrıottyq aktisiniń basty qundylyqtaryn bekitetin jańa qujattyń qabyldanatyndyǵyn atap kórsetken.

«Joldaýda ǵylymdy damytýǵa aıryqsha kóńil bólinip otyr. Elbasy ony joǵary oqý oryndarynyń ǵylymı-pedagogıkalyq qyzmetimen baılanystyrady. Aldaǵy ýaqytta Indýstrıalandyrý baǵdarlamasy sheńberinde 10 joǵary oqý ornynyń bazasynda ǵylym men ekonomıka sektorlary arasynda myqty baılanys ornatylady. Sonymen qatar, kadrlar daıarlaý máselesi sheshiledi. Joldaýda atalmysh joǵary oqý oryndarynyń materıaldyq-tehnıkalyq bazasyn qalyptastyrý boıynsha atqarylatyn mindetter pash etildi. Bul isterdi júzege asyrýǵa 2017 jylǵa deıin 10 mlrd. teńgege jýyq qarjy bólinedi» - dedi ǵalym óz sózinde.

Sondaı-aq, Ajar Baeshova Joldaýda ǵylym men ınnovatsııanyń baılanysy tereń kórsetilgendigin jetkizdi.

«Ǵylymnyń damýy joǵary oqý oryndarynyń ǵylymı-tehnıkalyq bazasymen tyǵyz baılanysty ekeni sózsiz. Óıtkeni, jaqsy jaraqtalǵan zerthanalar men oqý aýdıtorııalary jastarǵa sapaly bilim berýge múmkindik beredi. Elimizde shet eldik kompanııalarmen birlese otyryp, jobalyq ınjınırıngtik ortalyqtaryn ashý kózdelýde. Qazirdiń ózinde elimizde ashylǵan tehnologııalyq parkterde iri qazaqstandyq kompanııalardyń qosymsha óndiris kózderi shoǵyrlandyrylǵan. Demek, ǵylymsyz ınnovatsııa joq. Sondyqtan, ǵylymı jobalardy ınvestıtsııalaý nátıjesinde ekonomıkanyń jańa salalary paıda bolýy múmkin. Birinshi kezekte olar: mobıldik, mýltımedııalyq, nano jáne ǵaryshtyq tehnologııalar, robototehnıkalar, gendik ınjenerııa, ekologııalyq jaǵynan taza qýat kózderi. EHRO-2017 Halyqaralyq kórmesine daıarlyq barysynda Astana jasyl ekonomıka men bolashaqtyń energııasyn jasaý jolynda ǵylymı izdenis ortalyǵyna aınalatyn bolady», - dedi professor.

«Joldaýdyń árbir sózinde eldiń damýyna degen qamqorlyq erekshe seziledi. «Nurly jol» - bul jastardy bolashaqqa bastaıtyn jarqyn jol. Óıtkeni, jastarymyz osy Joldaýdyń arqasynda ǵylymı jobalarǵa belsene aralasatyn bolady. Búgingi stýdentter, erteńgi jas mamandar Joldaýdy kórsetilgen keleli josparlardy júzege asyrýǵa kirisedi. Bir sózben aıtqanda «Nurly jol - bolashaqqa bastaıtyn jarqyn jol» - dedi Ajar Baeshova