«Nurly jol» baǵdarlamasynyń arqasynda 92 myń bala balabaqshaǵa barý múmkindigine ıe boldy - A.Sárinjipov
Onyń atap ótýinshe, aǵymdaǵy jyly jalpy somasy 17,3 mlrd. teńgeni quraıtyn 51 nysan salynýda. Atalǵan bilim berý nysandarynyń 34-i - mektepter. Olardyń 26-sy úsh aýysymdy mektepterdiń, al 8-i apatty mektepterdiń ornyna salynyp jatyr. Qalǵan 17-si - mektepke deıingi mekemeler. «Bizde qurylys barysyna monıtorıng jasaıtyn arnaıy top qurylǵan. Aımaqtyń bilim berý departamentterimen birlesip, qurylys barysyn qadaǵalaıtyn arnaıy komanda bar. Búgingi kúni atalǵan nysandar qurylysy merzimin biz shamamen 1-2 aı alda oryndap kelemiz. Osy qarqyndy báseńdetpeý úshin biz qosymsha, 1,2 mlrd. teńge qarjy suraǵan bolatynyz. Bizdiń ótinishimiz qoldaý tapty. Aǵymdaǵy jyly qurylysqa biz birshama kóp qarjy beretin bolamyz», - dedi ol. Mınıstrdiń sózine qaraǵanda, bilim berý nysandaryn jergilikti kompanııalar otandyq materıaldar negizinde salyp jatyr. Sondyqtan da salaǵa bólingen qarjynyń daǵdarysqa qarsy tıimdiligi anyq baıqalady. «Nurly jol» baǵdarlamasynyń ekinshi baǵyty - bul mektepke deıingi mekemelerde memlekettik tapsyrys ornalastyrý. 92 myń orynǵa josparlanǵan soma 12 mlrd. 700 mln. teńge. Atap óterligi, osy baǵdarlamanyń arqasynda 92 myń bala mektepke deıingi bilim berý mekemelerine, balabaqshalarǵa barý múmkindigine ıe boldy. Búgingi kúni biz 12 mlrd. teńgeniń shamamen 9 mlrd. teńgesin aýdardyq. Tórtinshi toqsanǵa josparlanǵan qalǵan 3 mlrd. teńgeni oblystarǵa aýdaramyz», - dedi A.Sárinjipov.