«Nurly jol» baǵdarlamasyna 2016 jyly Ulttyq qordan 461,5 mlrd. teńge bólinedi

ASTANA. QazAqparat - «Nurly jol» ınfraqurylymdy damytý baǵdarlamasyn iske asyrýdy jalǵastyrýǵa Ulttyq qordan nysanaly transfert retinde 2016 jyly - 461,5 mlrd teńge, 2017 jyly - 750 mlrd teńge qarastyrylady. Búgin Májiliste «2016-2018 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda Qarjy mınıstri Baqyt Sultanov osylaı málimdedi.

«Bul rette Úkimet «Nurly jol» boıynsha qajettilik týyndaǵan jaǵdaıda baǵdarlama baǵyttaryn túzetý úshin jedel sharalar qabyldaýǵa 2016 jylǵa - 127,6 mlrd teńge, 2017 jylǵa - 750 mlrd teńge shyǵystardy shoǵyrlandyrmaq. Bul arnaıy rezerv túrindegi jańa qural bolyp tabylady», - dep atap ótti mınıstr.

Onyń aıtýynsha, respýblıkalyq bıýdjet shyǵystary 2016 jyly aǵymdaǵy deńgeıge qaraǵanda 74 mlrd teńgege ósedi jáne 7 trln 319 mlrd kóleminde josparlanǵan. Bul kórsetkish 2017 jyly 5,6 paıyzǵa ósip, 7 trln 731mlrd teńgeni, 2018 jyly 3,5 paıyzǵa nemese 274 mrd teńgege tómendep, 7 trln 757 mlrd teńge shamasynda josparlanady. «Jalpy bıýdjetti josparlaý qatań shekteýler jaǵdaıynda jáne Elbasynyń aǵymdaǵy jylǵy 19-20 tamyzynda ótken ekonomıkalyq saıasattyń júıeli sharalaryna arnalǵan otyrysta bergen tapsyrmalaryn eskere otyryp ázirlengen. Bul rette Úkimetke berilgen tapsyrmalardyń biri 2018 jyldyń aıaǵyna deıin shtattyq sandy ulǵaıtýǵa, sondaı-aq bılik deńgeıinde atqarylatyndardy qospaǵanda jańa bastamalarǵa moratorıı belgileý bolyp tabylady», - dedi Qarjy mınıstri.