«Nurly jol» baǵdarlamasyn júzege asyrýǵa taǵy da 200 mlrd teńge baǵyttaý kerek - B.Saǵyntaev

ALMATY. QazAqparat - QR Premer-mınıstriniń birinshi orynbasary Baqytjan Saǵyntaev búgin Almatyda ótken jıyn barysynda «Nurly jol» baǵdarlamasyn júzege asyrýǵa taǵy da 200 mlrd teńge baǵyttaý kerektigin aıtty.

«Ózderinizge belgili, «Nurly jol» baǵdarlamasy aıasynda jyl saıyn Qazaqstan ekonomıkasyna 3 mlrd dollar bólip otyrý kózdelgen. Keshe QR Premer-mınıstriniń tóraǵalyǵymen otyrys ótti. Onda keıbir salalardy qarjylandyrýdy kúsheıtý kerektigi aıtyldy. 2016 jyldan 109 mlrd teńge alynatynyn eskersek, qarjyny búginnen bastap quıý kerek. Ol úshin 100 mlrd teńgege qosymsha 200 mlrd teńge bólýdi usynyp otyrmyz»,- dedi B.Saǵyntaev.

Onyń aıtýynsha, bul usynys Memleket basshysynyń qaraýyna berildi. «Nurly jol» baǵdarlamasynyń jańa qosymshasy keńeıtilgen otyrysta jarııalanady.