«Nurly jol» baǵdarlamasy ınfraqurylym damýyn qamtamasyz etýge, jumys oryndaryn ashýǵa baǵyttalǵan - E.Saǵyndyqov

ASTANA. QazAqparat - «Nurly jol» baǵdarlamasy ınfraqurylym damýyn qamtamasyz etýge, jumys oryndaryn ashýǵa baǵyttalǵan. Bul týraly búgin QR Prezıdenti janyndaǵy brıfıngte QR Parlamenti Senatynyń depýtaty Eleýsin Saǵyndyqov aıtty.

«El Prezıdenti Qazaqstan halqyna arnaǵan Joldaýynda usynǵan «Nurly jol» baǵdarlamasy el ekonomıkasy úshin mýltıplıkatıvti tıimdi bolatyn ınfraqurylymdyq damýdy qamtamasyz etýge, jumys oryndaryn ashýǵa baǵyttalǵan», - dedi ol.

Senatordyń aıtýynsha, «Nurly jol» baǵdarlamasynda Ulttyq qor resýrstaryn qosa otyryp, dúnıejúzilik daǵdarystan shyǵýdyń jasampaz jospary bar. Bul strategııalyq jospardyń tabysty bolýynyń kepili - 2007-2009 jyldardaǵy daǵdarysqa qarsy tájirıbe.

«Qazaqstan - sol kezde ekonomıkalyq ósimniń oń dınamıkasyn saqtap qalǵan birer memlekettiń biri. Jumys ornynyń qysqarýyna jol bermeı, barlyq áleýmettik mindetterdi belgilegen merzimde, ári tolyqtaı oryndady»,- dedi E.Saǵyndyqov.