«Nurly jol» baǵdarlamasy aıasynda avtojoldardy álemdik deńgeıge jetkizý mindeti tur - S. Nurǵısaev

ASTANA. QazAqparat - Qazaqstandaǵy avtojoldardyń úshten biriniń jaǵdaıy qanaǵattanarlyq emes. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Parlament Májilisiniń depýtaty Serikbaı Nurǵısaev málim etti.

Májilis depýtatynyń málimetine qaraǵanda, 107 myń shaqyrymnan asatyn Qazaqstandaǵy joldardyń 20 paıyzyn jaqsy baǵalaýǵa bolady, al 47 paıyzynyń sapasy - ortasha, 33 paıyzy - qanaǵattanarlyq deńgeıde emes.

«Sondyqtan da, Elbasy aıqyndaǵan «Nurly jol» baǵdarlamasy aıasynda bizdiń aldymyzda barlyq avtojoldardy jóndeý maqsaty qoıylyp otyr. Árıne, joldarǵa qatysty problemalar bar, ol týraly aıtylyp ta jatyr. Arnaıy baǵdarlamalar qabyldanyp, qarajattar bólinýde. Sondyqtan da, bizdiń aldymyzda avtojoldardy álemdik deńgeıge jetkizý mindeti tur», - dedi Serikbaı Nurǵısaev.

Depýtattyń aıtýynsha, 2014 jyly jergilikti bıýdjetten joldardy jóndeýge 93,2 mlrd teńge bólingen. Al aǵymdaǵy jyly jergilikti bıýdjetten jergilikti mańyzdaǵy joldar úshin 2 mlrd. teńge qarastyrylyp otyr. Budan bólek, aldaǵy ýaqytta tutastaı jol jóndeý men jol qurylystaryna 2,4 trln. teńge jumsalmaq.