«Nurly jol» baǵdarlamasy aıasynda 101 mlrd teńge jańa daǵdarysqa qarsy sharalarǵa qaıta bólinedi

ASTANA. QazAqparat - Elbasynyń tapsyrmasyna sáıkes, «Nurly jol» ınfraqurylymyn damytýdyń memlekettik baǵdarlama jobasy sheńberinde 101 mlrd teńge qarajatty 2015 jylǵy jańa daǵdarysqa qarsy sharalarǵa qaıta bólý qarastyrylady. Bul týraly búgin Májilistiń jalpy otyrysynda «2015-2017 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyna baılanysty Ulttyq ekonomıka mınıstri Erbolat Dosaev osylaı málim etti.

«2015 jyly Ulttyq qordan áleýmettik ınfraqurylym qurylysyna josparlanǵan 30 mlrd teńgeni olardyń nysanaly maqsatyn naqtylaý arqyly bólý qarastyrylady. Sonyń ishinde 17 mlrd 300 mln. teńgeni birinshi kezektegi bilim berý nysandarynyń qurylysyna, úsh aýysymdyq oqytý jáne mektepterdiń apatttylyǵyn joıýǵa baǵyttaý kózdeledi. 12 mlrd 700 mln. teńgeni mektepke deıingi bilim berý uıymdaryna memlekettik tapsyrys berýge baǵyttaý qarastyrlady. 71 mlrd teńgeni 2016 jyly Ulttyq qordan qosa qarjylandyra otyryp, turǵyn úı qurylysy sharýashylyǵyn jańǵyrtý jumsalady», - dedi Ulttyq ekonomıka mınıstri.

Onyń aıtýynsha, agroónerkásip salasyn qoldaýǵa 20 mlrd. teńge, «Bıznestiń jol kartasy-2020» sheńberindegi jobalar úshin ınfraqurylym júrgizýge 10 mlrd teńge, tehnıkalyq retteýdi damytý arqyly ishki naryqty qorǵaýǵa 5 mlrd teńge, geologııalyq barlaý júrgizýdi jandandyrýǵa 6 mlrd teńge, turǵyn úı qurylysyn ulǵaıtýǵa 30 mlrd teńge kózdeledi.