«Nurly jer»: Tarazda kópqabatty 9 úı paıdalanýǵa berildi

TARAZ. QazAqparat – Búgin Taraz qalasynda «Nurly jer» memlekettik baǵdarlamasy boıynsha kópqabatty 9 turǵyn úı paıdalanýǵa berildi», - dep habarlaıdy QazAqparat.

№15 shaǵynaýdandaǵy úıler QR Konstıtýtsııasy kúni merekesi qarsańynda tapsyryldy. Turǵyn úılerde barlyǵy 720 páter ornalasqan, onyń 200-ge jýyǵyna banktiń tıisti sheshimi berilse, 200-ge jýyq otbasy qonys toıyn toılaǵaly otyr.

Páter kiltin tabystaý saltanatyna oblys ákimi Asqar Myrzahmetov arnaıy qatysyp, qýanysh ıelerine quttyqtaý tilegin bildirdi.

«Baspana- qaı ýaqytta da ózekti másele. Qala halqynyń sanynyń ósýimen turǵyn úıge degen suranys kólemi de ulǵaıýda. Táýelsizdik jyldary elimizde Elbasynyń basshylyǵymen qazaqstandyqtardy turǵyn úımen qamtamasyz etý boıynsha úlken jumystar atqaryldy. Sonyń ishinde qalada jańadan turǵyzylyp jatqan 15-shaǵynaýdan ornalasqan jer birneshe jyl buryn ashyq dala bolatyn. Al qazir jańa turǵyn úıler boı kótergen shaǵynaýdanǵa aınaldy. Prezıdenttiń bes áleýmettik bastamasy boıynsha jarııalanǵan basty maqsattardyń biri – halyqty turǵyn úımen qamtamasyz etý», - dedi ol.

Oblysta «Nurly jer» memlekettik baǵdarlamasy aıasynda aǵymdaǵy jyly 17,6 mlrd teńgege barlyǵy 30 kópqabatty (2 118 páterli) turǵyn úıdiń qurylysy júrgizilip, jyl sońyna deıin olardyń 28-in (1 988 páterli) paıdalanýǵa berý josparlanǵan.

Sonymen birge, bıylǵy I jartyjyldyqta kópbalaly otbasylarǵa 120 páterdiń kilti tabystaldy. Onyń ishinde 93 páter arendalyq úıler bolsa, 27-si demeýshiler esebinen turǵyzylǵan.

Jyl sońyna deıin 493 kópbalaly otbasyn turǵyn úımen qamtamasyz etý josparlanǵan. Kezekteri kelgenge deıin kópbalaly otbasylardyń turǵyn úı máselesin ýaqytsha sheshý úshin 612 páterli 12 jataqhana qurylysyna tıisti qarajat qarastyrylyp, jyl sońyna deıin paıdalanýǵa berý josparlanýda.

Búgin páter kiltin ıelengender qatarynda áleýmettik az qamtylǵandar, memlekettik jáne bıýdjettik uıym qyzmetkerleri bar.

Atalǵan turǵyn úılerdiń qurylys jumystaryn «Agrospetsstroı» JShS, «Tarazstroı 2004» JShS, «JSHI» JShS, «BARAT&CO» JShS, «Taraz-Іsmer» JShS kompanııalary júrgizdi. Merdiger kompanııalar turǵyn úılerdiń sapasyna kepildik berip otyr.

Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sııaqty ıgi sharalar dástúrge aınaldy.