«Nurly jer»: Shymkentte 1,5 myńnan astam páter beriledi

ShYMKENT. QazAqparat - Shymkent qalasynda bıyl naýryz aıynyń sońyna deıin «Nurly jer» memlekettik baǵdarlamasy aıasynda 976 páterdi kezekte turǵan azamattarǵa satyp alý quqyǵynsyz, arendalyq negizde berý josparlanǵan.

Sonymen qatar, bıyl jetim jáne ata-anasynyń qamqorlyǵynsyz qalǵan balalar men kópbalaly otbasylarǵa, halyqtyń áleýmettik jaǵynan álsiz toby men jumys isteıtin jastarǵa 1580 páter úlestirilmek.

Bul týraly qala ákimi Murat Áıtenovke 2020 jyly atqarylǵan jumystar týraly esep bergen qalalyq turǵyn úı basqarmasynyń basshysy Ǵalymjan Tólepov baıandady, dep habarlaıdy QazAqparat.

Basqarma basshysynyń aıtýynsha, bıyl «Nurly jer» memlekettik baǵdarlamasynyń «Baqytty otbasy» («2-10-20») nesıelendirý sharty aıasynda az qamtylǵan 350 otbasyn baspanamen qamtý josparlanýda.

«Shańyraq» pılottyq jobasy boıynsha («5-10-20» nesıelendirý sharty) úı kezeginde tirkelgen 1728 otbasyn baspanamen qamtamasyz etý kózdelgen. Odan bólek «Nurly jer» memlekettik baǵdarlamasynyń «7-20-25» nesıelendirý sharty aıasynda 108 azamatqa páter berilmek.

Esepte kórsetilgendeı, «Nurly jer» memlekettik baǵdarlamasy aıasynda Shymkentte respýblıkalyq bıýdjet esebinen kóp páterli 35 úıdi kúrdeli jóndeý josparlanǵan. Atap aıtqanda, úılerdiń lıft qondyrǵylaryn aýystyrý, kommýnaldy menshiktegi úılerdi aǵymdaǵy nemese kúrdeli jóndeý qarastyrylǵan.