Nurly jer: Maqtaralda kópbalaly otbasylarǵa úı alýǵa 420 mln teńge bólindi

MAQTAARAL. QazAqparat - Maqtaaral aýdanynda bıyl «Nurly jer» baǵdarlamasy aıasynda az qamtylǵan kópbalaly analarǵa turǵyn úı satyp alý boıynsha 50 turǵyn úıge 420 mln teńge qarjy respýblıkalyq bıýdjet esebinen bólindi. Osyǵan oraı, 50 baspanany satyp alý boıynsha memlekettik satyp alý rásimi júrgizildi. Bul jaıynda shekaralas aýdandardyń jumysyn qadaǵalaýǵa kelgen oblys ákimi Ómirzaq Shókeev málimdedi, dep habarlaıdy QazAqparat.

Tehnogendik apat bolǵan Maqtaaaral aýdanyndaǵy apat saldaryn joıý jumystarynan bólek, aýdan ınfraqurylymyn damytý jumystaryn da qatar júrgizilýde.

Qazirgi tańda aýdanda 21 áleýmettik nysannyń qurylysy júrip jatyr. Onyń ishinde ortalyq stadıon bıyl paıdalanýǵa tapsyryldy jáne 20 nysan 2021 jyly aıaqtalady.

«Tótenshe jaǵdaı saldaryn joıý boıynsha 8 áleýmettik nysannyń qurylysy júrgizilýde. 1 mektep, 1 balabaqsha, 1 polıtsııa pýnkti, 3 dárigerlik ambýlatorııa jáne 2, feldsherlik-dárigerlik ambýlatorııa salynyp jatyr. Salystyrmaly túrde alsaq, Maqtaral aýdanynda 2019 jyly qurylys salasyna 7 917 mlrd teńge qaralsa, 2020 jylǵa 29 mlrd teńge qaraldy», - dedi aımaq basshysy Ómirzaq Shókeev.

Sondaı-aq, Fırdoýsı aýylynda 600 oryndyq mektep aǵymdaǵy jóndeýden ótse, 1 dárigerlik ambýlatorııa men 1 polıtsııalyq tirek pýnkti salynýda.

Óńir basshysy qurylys alańdaryn aralap, ondaǵy jumys barysyn baqylap qaıtty.

Maqtaaral aýdanynda 2018 jyly 69 eldi mekenniń 67-i, ıaǵnı 99,9% turǵyndar aýyz sýmen qamtyldy degen kórsetkish bar.

Alaıda keıbir aýyldarda sý júıeleriniń tozyǵy jetken. 2018-2019 jyldary 5 eldi mekendegi (Qońyrat, Dıhan, Alǵabas, Maqtajan, Jeńis) aýyz sý júıeleri jańartyldy.

2020 jyly taǵy 5 nysannyń (Naýryz, Alash, Órgebas, Atakent, Bereke) qurylysyna bıýdjetten 274 mln-ǵa jýyq teńge bólinip, 3 nysannyń (Naýryz, Alash, Órgebas) qurylysy aıaqtaldy.

2021 jyly 3 nysannyń (Atakent, Bereke, Iirjar) qurylysyna bıýdjetten 516 mln. teńge bólindi.

2018 jyly 69 eldi mekenniń 27-i, ıaǵnı 57,8% turǵyndary tabıǵı gazben qamtylǵan bolatyn. 2018-2019 jyldary júrgizilgen jumys nátıjesinde taǵy 9 eldi mekenge gaz jetkizilip, gazben qamtylǵan turǵyndar úlesi 63%-dan asty.

Qalǵan turǵyndardy gazben qamtý úshin quny 5 mlrd teńge bolatyn 11 jobanyń (1 AGRS, 1 gaz qubyry , 9 eldimeken) qujaty daıyndalyp, sonyń ishinde 6 nysan (AGTS, gaz qubyry jáne 4 eldimeken) qurylysyna bıýdjetten qarjy qarastyrylyp jatyr.

Al qalǵan 5 nysannyń (5 eldimeken) qurylysyn júrgizý memlekettik jekeshelik áriptestik baǵdarlamasy arqyly júrgiziledi.

Maqtaaral aýdanynda shalǵaıdaǵy shaǵyn 8 úı, 55 adam turatyn Dostyq eldimekeninen basqa barlyq aýyldar ortalyqtandyrylǵan elektr jelisine qosylǵan.

Alǵabas, Pernebaev, Qońyrat aýyldaryndaǵy tozyǵy jetken elektr jelisin jańartýǵa 2021 jylǵa bıýdjetten 130 mln teńge qarastyryldy.

Sonymen qatar, 11 aýyldyń elektr jelisin jańartýǵa qujat ázirlenip, 456 mln teńge bólýge bıýdjettik ótinim usynylady.