«Nurly jer»: Qostanaı oblysynda 3600 páter paıdalanýǵa berildi

QOSTANAI. QazAqparat – Qostanaı oblysynda nesıelik úıler kóptep salynbaq. Bul týraly oblys ákimi Arhımed Muhambetov áleýmettik jelide jazdy, dep habarlaıdy QazAqparat.

Oblys ákimdiginde ótken apparat jıynynda «Nurly jer» memlekettik baǵdarlamasynyń nátıjeleri talqylandy. 2020 jyly «Nurly jer» boıynsha oń nátıjelerge qol jetkizildi. Oblysta 379,4 myń sharshy metr turǵyn úı (3600 páter) paıdalanýǵa berildi, bul ótken jyldyń deńgeıinen 13,1%-ǵa joǵary.

«2021 jyly oblys turǵyn úıdi iske qosý kórsetkishin 10%-ǵa arttyrady. Bul 417,2 myń sharshy metrdi quraıdy, onyń ishinde paıdalanýǵa berý, satyp alý quqyǵynsyz jalǵa beriletin turǵyn úı, JAO oblıgatsııalaryn shyǵarý arqyly kredıttik turǵyn úı, kommertsııalyq turǵyn úı jáne jeke turǵyn úıler bar. Bıyl nesıelik úıler kóptep salynady», - dedi Arhımed Muhambetov.

Aımaq ákimi tıisti basqarmalar men aýdan-qala basshylaryna memlekettik baǵdarlamalardy sapaly oryndaýdy tapsyrdy.