«Nurly jer» elimizdiń qurylys salasyn damytýǵa jańa serpin beredi -Baıbek
Ákim Baýyrjan Baıbek óziniń quttyqtaý sózinde qalanyń JAÓ qurylys sektorynyń úlesi 262 mlrd teńge bolǵanyn atap ótti. Tek ótken jyldyń ózinde ǵana 1,9 mln sharshy metrden astam turǵyn úı paıdalanýǵa berildi. Bul 2015 jylmen salystyrǵanda 35%-ǵa kóp.
«Qurylysshy mamandyǵy barlyq kezeńde úlken abyroı men qurmetke ıe. Sizder tek qana úı, ınfraqurylym nysandaryn salýmen shektelmeısizder. Qalalardyń arhıtektýralyq kelbet beretin de,ekonomıkany damytatyn da Sizder. Qurylysshylardyń arqasynda ómir sapalyq jaǵynan oń sıpatqa ıe bolyp, azamattardyń turmys jaǵdaılary jaqsarady. Ózderińiz bilesizder, Elbasynyń tapsyrmasy boıynsha bıylǵy jyldan bastap «Nurly jer» turǵyn úı baǵdarlamasyn júzege asyrý bastalady.Onyń basty maqsaty - taıaýdaǵy 15 jyl ishinde 1,5 mıllıon otbasyn turǵyn úımen qamtamasyz etý. Baǵdarlamaǵa turǵyn úı naryǵyn qoldaýdyń keshendi sharalary engizilgen. Bul, sóz joq, elimizdiń qurylys salasyn damytýǵa jańa serpin beredi. Bizdiń negizgi mindetimiz - almatylyqtardyń turǵyn úı máselesin sheshý. «Nurly jer» baǵdarlamasyn júzege asyrý barysynda 73 turǵyn úı salynýda, onyń 24-iniń qurylysy bıyl aıaqtalady», - dedi B.Baıbek.
Qala basshysy 2015 jyldan bastap qurylys salasyna quıylǵan ınvestıtsııa kóleminiń 17%-ǵa artqanyn aıtty. Tek bıylǵy birinshi jartyjyldyqtyń ózinde qurylys salasyna 235 mlrd teńge ınvestıtsııa bólingen.
Búginde Almatyda turǵyn úı jáne azamattyq baǵyttaǵy 1 140 nysannyń qurylysy júrip jatyr. Bulardyń 762-si - jeke ınvestıtsııa arqyly, al 378 nysan bıýdjet arqyly qarjylandyrylýda.
Memlekettik baǵdarlamalar aıasynda 2016-2017 jyldary ákimdik tarapynan 1 040 páterli 19 turǵyn úı salyndy. «Qoljetimdi baspana - 2020» baǵdarlamasy boıynsha bıyl «Saıaly», «Jas Qanat» yqsham aýdandarynda taǵy 17 turǵyn úıdi iske qosý josparlanǵan.
«Eski úılerdi súrý» qalalyq baǵdarlamasy boıynsha 3 jańa úı salynyp, eski úılerdiń turǵyndary jańa qonysqa kóshirildi. Búgingi kúni zamanaýı yqsham aýdanǵa aınalǵan Atletter aýylynan 1 748 otbasy páter aldy.
Bıyl 42 bilim berý nysanynyń qurylysy jáne seısmıkalyq qýatyn nyǵaıtý qarastyrylǵan. Onyń 29-y bıyl iske qosylady. Densaýlyq saqtaý salasynyń 18 nysany salynyp jatyr. Jyl aıaǵyna deıin 10 nysan paıdalanýǵa beriledi.