«Nurly jer»: BQO-da aldaǵy eki jylda salymshylar úshin 13 úı salynbaq

ORAL. QazAqparat - «Nurly jer» baǵdarlamasy aıasynda aldaǵy eki jylda Turǵyn úı qurylys jınaq banki klıentteri úshin 13 úı salynbaq. Bul týraly búgin óńirlik kommýnıkatsııalar qyzmeti alańynda «Qazaqstan turǵyn úı qurylys jınaq banki» AQ BQO fılıalynyń basshysy mindetin atqarýshy Aıgúl Naýryzálıeva málim etti, dep habarlaıdy QazAqparat tilshisi.

Onyń aıtýynsha, 13 salynyp bitken kezde 1903 páter paıdalanýǵa beriledi. Bul ótken jyldarǵa qaraǵanda, eki ese kóp.

«Nurly jer» baǵdarlamasyna engiziletin ózgerister bekitildi. Endi, jańa erejege sáıkes, Turǵyn úı qurylys jınaq banki («Báıterek» holdınginiń enshiles uıymy) salymshylaryna jyldyq mólsherlemesi 5 paıyz bolatyn jeńildetilgen zaem alý úshin shottaryna úı baǵasynyń 20 paıyzyna teń bastapqy jarna jınaý jetkilikti», dedi A.Naýryzálıeva.

Buǵan deıin «Nurly jer» baǵdarlamasy aıasynda beriletin nesıeniń bastapqy jarnasy úı qunynyń 30 paıyzyn quraıtyn edi.

Elbasy tapsyrmasyna sáıkes qolǵa alynǵan «Nurly jer» baǵdarlamasy halyqtyń áleýmettik turǵydan osal toptaryn qoldaýǵa baǵyttalǵan.

Azamattardyń bul sanatyna bastapqy jarna jınaý ońaı emes. Bul jaqsy jańalyq bolyp otyr. «Nurly jer» baǵdarlamasyna ózgerister engizilip, bekitildi, nátıjesinde úıge dep aqsha jınaý jeńildeı tústi. Mysaly, Batys Qazaqstan oblysynda memlekettik baǵdarlamaǵa qatysý úshin shotqa 1,1 mln teńge kólemindegi soma jınaý jetkilikti.

Kúni búgin Turǵyn úı qurylys jınaq banki salymshylaryna memlekettik baǵdarlama aıasynda boı kótergen Zachagan kentindegi jańadan damyp kele jatqan «Kóktem» yqshamaýdanynan turǵyn úı usynylady. Mundaǵy páterlerdiń 1 sharshy metriniń baǵasy 131 myń -140 myń teńge aralyǵynda.

Qazir 210 páterge ótinish qabyldanyp jatyr.

Bir bólmeli páterdiń baǵasy 5 639 200 teńgeni quraıdy, sáıkesinshe bastapqy jarna keminde 1 127 840 teńge bolýy kerek. Nesıe boıynsha aı saıynǵy tólem alǵashqy 8 jyl ishinde 41 120 teńgege teń, keıin ol 26 168 teńgege deıin tómendeıdi, ony klıentter taǵy 11 jyl boıy ótep otyrady.

Bank klıentteri úshin taǵy bir ózekti jańalyq - «Óz úıim» baǵdarlamasyna qatysýshylar úshin jyldyq mólsherlemeniń 7 paıyzǵa deıin tómendeýi. Budan bólek bank salymshylaryn qoljetimdi sharshy metrlermen qamtamasyz etý úshin «Óz úıim» baǵdarlamasy aıasynda eń tómengi bastapqy jarna 20 paıyzǵa deıin tómendetildi.

«Óz úıimniń» artyqshylyǵy - baǵdarlama aıasynda satylatyn úıler baǵasynyń naryqtan tómen bolýy. Sondaı-aq qatysýshylardyń menshiginde jyljymaıtyn múliktiń bar-joqtyǵyna bank qaramaıdy.

«Nurly jer» jáne «Óz úıim» baǵdarlamalarynyń aıasyndaǵy barlyq jańa nysandar týraly aqparat baspana.kz portalynda jarııalanady. Munda úıden úmitker ótinish qabyldanyp jatqan-jatpaǵanyn bilip, unatqan páterdi tańdap, úı satyp alýshylar pýlyna qatysý úshin ótinish bere alady», dep túsindirdi Aıgúl Ábýǵalıqyzy.