Nurly jer: Bıyl salynatyn arendalyq páterlerdiń sany belgili boldy
Mınıstrdiń aıtýynsha, búginde áleýmettik jaǵynan az qamtylǵandardy arendalyq páterlermen qamtamasyz etý maqsatynda jyl saıyn 25 mlrd teńge bólinedi. Atalǵan aqsha barlyq aımaqtarǵa teń taratylady. "Atalǵan baǵytta ótken jyly barlyq aımaqtarda 5 391 páterdiń qurylysy bastalǵan bolatyn. Sonyń ishinde 2 620 páter paıdalanýǵa berildi. Osy oraıda Qaraǵandy oblysynyń tıisti jospardy oryndamaǵanyn atap ótken jón. Jalpy, byltyr óńirlerge bólingen 25 mlrd teńgeniń 24,8 mlrd-y ıgerildi", - dedi J.Qasymbek.
Mınıstrdiń sózine qaraǵanda, aǵymdaǵy jylda 3 507 arendalyq páterdi salyp shyǵý josparlanǵan. "Alaıda 2018 jyldyń josparyn usynǵanda Mańǵystaý oblysy barlyq qujattardy tapsyrǵan joq", - dep atap kórsetti J.Qasymbek.
Aıta keteıik, mınıstrliktiń josparyna sáıkes, 15 jylda 40 myń arendalyq baspana paıdalanýǵa beriledi. Ol úılerdiń ortasha aýdany 50-60 sharshy metr bolady. Atalǵan baspana aldymen múgedekter men jetimder arasynda taratylady. Páterdi jalǵa alý quny da qymbat emes. Bir sharshy metri úshin aıyna 100 teńgeden shyǵady. Sonda bir páterdiń aýdany 50 sharshy metr bolsa, aılyq jalǵa alý quny 5 000 teńge shamasynda bolady. Degenmen, ol aqsha tek páterdi jalǵa alý aqysy ǵana ekenin umytpaý qajet. Onyń syrtynda kommýnaldyq tólemder taǵy bar.