Nurly jer: Bıyl Aqmolada 501 myń sharshy metr baspana paıdalanýǵa beriledi

KÓKShETAÝ. QazAqparat - Aqmola oblysynda «Nurly jer» baǵdarlamasy aıasynda bıyl barlyǵy 501 myń sharshy metr baspana paıdalanýǵa beriledi. Bul týraly óńirlik kommýnıkatsııalar qyzmetinde ótken brıfıngte oblystyq qurylys basqarmasynyń basshysy Marat Áýbákirov aıtty, dep habarlaıdy QazAqparat tilshisi.

Basqarma basshysynyń aıtýynsha, «Nurly jer» baǵdarlamasy qolǵa alynǵannan beri eki jyl ishinde 900 myń sharshy metr baspana paıdalanýǵa berilip, 8 000 otbasy baspana máselesin sheshken. Bıylǵy jyly 501 myń sharshy metr baspana nemese 5 000 páter paıdalanýǵa berý josparlanǵan. Onyń 404 myń sharshy metri aǵymdaǵy toǵyz aıdyń paıdalanýǵa berildi.

«Aqmola oblysynyń turǵyn úı qurylysy barlyq baǵyt boıynsha júzege asyrylýda. 2019 jyly baspana qurylysyna 11,4 mıllıard teńge qarjy qarastyrylǵan. Onyń 7,5 mıllıard teńgesi - respýblıkalyq bıýdjet esebinen, 2,4 mıllıardy - oblystyq bıýdjetten jáne 1,5 mıllıard teńgesi - memlekettik qundy qaǵazdardy shyǵarý arqyly «Baıterek development» AQ tartqan qarjy esebinen», - dep túsindirdi M.Áýbákirov.

Brıfıngte baǵdarlamanyń baǵyttaryn júzege asyrý barysy da aıtyldy.

«Eki jylda jaldamaly 20 turǵyn úı salyndy. Memleket ınvestıtsııasy esebinen salynyp jatqan 35 turǵyn úıdiń bıylǵy jyly 14 jaldamaly jáne 12 nesıelik úıi paıdalanýǵa beriledi. Sonymen qatar, baspana máselesin sheshýge óńirde bıznes qurylymdary atsalysýda. Jalpy, jaldamaly jáne demeýshilerdiń qarajaty esebinen bıylǵy jyly áleýmettik jaǵynan az qamtylǵan 870 otbasynyń baspana máselesi sheshilmekshi»,- dep túıindedi basqarma basshysy.