Nurly jer: Batys Qazaqstanda 11 kóppáterlik turǵyn úı salynbaqshy

ORAL. QazAqparat – «Nurly jer» baǵdarlamasy aıasynda bıyl Batys Qazaqstan oblysynda 11 kóppáterlik turǵyn úı (1 414 páter), aýyldyq eldi mekende 108 turǵyn úı (716 páter) salý kózdelýde, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonymen qatar 46 ınjenerlik-kommýnıkatsııalyq ınfraqurylym nysany qurylysy júrgizilmek.

Baǵdarlama aıasynda qurylysqa 18 mlrd teńge jumsalmaqshy.

Álibek Saıynulynyń sózine qaraǵanda, bıyl 586,7 myń sharshy metr turǵyn úıdi paıdalanýǵa berý kózdelýde.

Atap aıtqanda, 9 kóppáterlik turǵyn úı (1 126 páter) jáne aýyldardy 67 turǵyn úı (379 páter) qurylysy jyl aıaǵyna deıin bitpekshi. Sonyń ishinde «Otbasy bank» salymshylary úshin 7 kóppáterlik úı (altaýy Oralda, bireýi Aqsaı qalasynda, 802 páter), aýylda (Toqpaıda) 40 turǵyn úı (240 páter) beriledi. Jergilikti atqarýshy organdarda kezekte turǵandar úshin 2 kóppáterlik turǵyn úı (bireýi Oralda, ekinshisi Aqsaıda, 324 páter), aýyldarda 27 turǵyn úı (139 páter) iske qosylmaqshy.

«Nurly jer» baǵdarlamasy aıasynda Oral qalasynyń soltústik-shyǵys bóliginde jáne Zachagan kentinde jańa shaǵynaýdandar boı kóterdi. Oǵan qosa «Aqjaıyq» shaǵynaýdanynda barlyq magıstraldyq ınjenerlik jeliler tartyldy. Qazirgi kezde 25 kóppáterlik turǵyn úıdiń jobalyq-smetalyq qujattamasy ázirlenip, saraptamadan ótýde», dedi Á.Antazıev.

Eske sala keteıik, budan buryn Oralda nóser jaýynnan keıin 7 turǵyn úıge sý kirgenin jazǵan bolatynbyz.