«Nurly jer» baǵdarlamasyna ózgerister engiziledi - mınıstr Qasymbek

ASTANA. QazAqparat - QR Investıtsııalar jáne damý mınıstri Jeńis Qasymbek «Nurly jer» memlekettik baǵdarlamasyna ózgeristerdiń engiziletinin mádimdedi, dep habarlaıdy QazAqparat tilshisi.

Mınıstrdiń aıtýynsha, «7-20-25» baǵdarlamasyn iske asyrýǵa baılanysty turǵyn úı jınaq júıesine ózgeris engizýge týra keledi.

«Ulttyq bank ázirlegen mexanızmderdi esepke ala otyryp, sáýir aıynda «Nurly jer» baǵdarlamasyna ózgeristerdi engizemiz. Atalǵan ózgerister «7-20-25» baǵdarlamasynyń normalaryn tıimdi iske asyrýǵa yqpal etetin bolady. Atap aıtqanda, turǵyn úı qurylysynyń kólemin ulǵaıtý normalary men Turǵyn úı qurylys jınaq bankiniń zaemdaryn berý talaptary qaıta qaralady», - dedi J.Qasymbek Úkimettiń búgingi otyrysynda.

Budan bólek, qurylys alańdaryna ınjenerlik-kommýnıkatsııalyq jelilerdi tartýǵa jyl saıyn bólinetin qarjyny 80 mlrd teńgeden 100 mlrd teńgege deıin arttyrý josparlanǵan.

Aıta keteıik, otyrysta Ulttyq banktiń tóraǵasy Danııar Aqyshev «7-20-25» baǵdarlamasynyń jobasyn tanystyrdy. Bas bankır 7 protsenttik ıpotekanyń basty talabyn da jarııalady.