Nurly jer baǵdarlamasy boıynsha jeńildetilgen nesıe beriledi

ASTANA. QazAqparat - 2018 jyly «Nurly jer» baǵdarlamasy aıasynda Turǵyn úı qurylys jınaq bankine jeńildetilgen nesıe berý úshin 24 mlrd teńge bólinedi, dep habarlady banktiń baspasóz qyzmeti.

Bul qarajat respýblıkalyq basym baǵyttaǵy ınvestıtsııalar tizimine endi jáne bıylǵy bıýdjet aıasynda qarastyrylyp otyr. Bul týraly «Báıterek» holdınginiń basshysy Aıdar Áriphanovtyń tóraǵalyq etýimen ótken «Qazaqstannyń Turǵyn úı qurylys jınaq banki» AQ («Báıterek» holdınginiń enshiles uıymy) Dırektorlar keńesiniń otyrysy barysynda aıtyldy.

«Nurly jer» baǵdarlamasy bıýdjettik nesıe túrinde jyl saıyn bankke 24 mlrd teńge kólemindegi qarjy bólýdi qarastyrady. Bul aqshaǵa bank salymshylary 5% kólemindegi jeńildetilgen mólsherlememen aldyn ala jáne aralyq turǵyn úı qaryzyn ala alady. Ol úshin Turǵyn úı qurylys jınaq banki shotynda 30% kólemindegi eń tómengi alǵashqy jarna bolýy qajet» - delingen habarlamada.

Eske salaıyq, 2017 jyldyń qorytyndysy boıynsha Turǵyn úı qurylys jınaq banki memleket bólgen 30 mlrd teńgeni ıgergen edi. Bul qarjyǵa 3 488 qazaqstandyq otbasy «Nurly jer» aıasynda tómen baǵamen úı satyp alǵan bolatyn.

Sondaı-aq, jınalys barysynda bank 2017 jyldyń tórtinshi toqsanynyń nátıjesi boıynsha Іshki aýdıt departamentiniń qyzmeti týraly esep berip, Dırektorlar keńesine usynylatyn eseptilik tizimin bekitti.

Málimetterge sáıkes, Dırektorlar keńesi tórtinshi toqsanda Turǵyn úı qurylys jınaq banki qyzmetine qatysty 80 máseleni qarastyrǵan.