«Nurly jer» baǵdarlamasy Aqtóbe oblysynda qurylys materıaldarynyń tapshylyǵyn týyndatty

ASTANA. QazAqparat - «Nurly jer» baǵdarlamasy qurylys salasyn damytýǵa eleýli yqpal etti. Búgin baspasóz máslıhatynda Aqtóbe oblysynyń ákimi Berdibek Saparbaev osylaı málim etti, dep habarlaıdy QazAqparat.

«Nurly jer» baǵdarlamasynyń halyqqa qandaı paıdasy bar ekenin jaqsy bilesizder. Bul baǵdarlamany júzege asyrý úshin 1 200 gektar jerdi bólip, qazirgi tańda ınfraqurylymyn tolyǵymen jasadyq. Bizdiń boljamymyz boıynsha úsh jyldyń ishinde osy jerde kem degende 4 200 turǵyn úı bolýy kerek. Sonyń nátıjesinde osy aýmaqta 110 myńnan astam turǵyndar qonystanýy kerek. Bul jerde salyp jatqan úıler bir-ekiden bes qabatqa deıin jetedi»,-dedi oblys ákimi.

Onyń sózine qaraǵanda, búginde salynyp jatqan turǵyn úıdiń bir sharshy metri 120 myń teńgeden aspaıdy.

«Osy baǵdarlamanyń taǵy bir artyqshylyǵyna toqtalsaq, qurylys materıaldarynyń 80-85 paıyzy qazaqstandyq qamtý aıasynda paıdalanylýda. Búginde Aqtóbe oblysynyń qurylysy 100 paıyzǵa jumyspen júktelgen. Jyl boıy kirpishtiń, tsementtiń, qıyrshyq tastyń, temirbetonyń jáne basqa da materıaldardyń tapshylyǵy sezildi. Atap aıtqanda, bul baǵdarlama basqa da salalardy damytý úshin janama áser berip jatyr», - dedi Saparbaev.

Qurylys sapasy turaqty baqylaýda. Jańa tehnologııalardy qoldanýdyń arqasynda bir úı ortasha eseppen 2-3 aıda salynady, bul standartty qurylysqa qaraǵanda eki ese jyldam.

Sonymen qatar oblys ákimi bıylǵy jyldyń sońyna deıin jalpy aýdany 100 myń sharshy metr bolatyn keminde 144 az qabatty jáne jeke nesıelik turǵyn úı paıdalanýǵa beriletinin jetkizdi. Osy oraıda myń otbasy qonys toıyn toılaıdy dep kútilýde.